Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 234 Hüküm no: 234 Orijinal metin no: [33b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullâh bt. Abdurrahman’ın kocası el-Hâc Hasan b. Abdullah’ın Sakız’a giderken İpsara açıklarında batan gemide boğulduğu ve İpsara’ya defnedildiği Mahmiye-i İstanbul’da Hüsrev Paşa Türbesi kurbünde sâkine işbu râfi‘atü’l-vesîka Emetullâh bt. Abdurrahman nâm hâtundan istihbâr-ı şer‘î sudûrundan sonra udûl-i ahrâr-ı ricâl-i Müslimînden olup mahrûse-i Galata muzâfâtından kasaba-i Tophane’de Karabaş Mustafa Ağa mahallesi ahâlîsinde Aşcızâde el-Hâc Mehmed b. Hüseyin ve el-Hâc Mustafa b. Ahmed nâm kimesneler li-ecli’l-ihbâr meclis-i şer‘a hâzırân olup isre’l-istişhâd işbu müstahbire-i mezbûre Emetullâh Hâtun’un <>zevci el-Hâc Hasan b. Abdullah b. Abdülmennân târih-i kitâbdan altı ay mukaddem İstanbulluoğlu Mehmed Reis’in örf-i mellâhînde Sakız kayığı ta‘bîr olunur sefînesiyle İstanbul’dan cezîre-i Sakız’a giderken esnâ-i tarîkde İbsala [İpsara] üzerinde sefîne-i mezbûre bi-emri’llâhi te‘âlâ şiddet-i fırtınadan nâşî gark oldukda mezbûr el-Hâc Hasan dahi garîkan vefât eyleyip cenâzesi İbsala’da defn olundu deyü muhbirân-ı mezbûrândan her biri keyfiyet-i muharrereyi alâ-tarîki’ş-şehâde haber vermeğin mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis min-Zilka‘deti’ş-şerîfe sene 1137. Şuhûdü’l-hâl: İbrahim Çelebi b. Muharrem, Halil Çelebi b. Mustafa, İbrahim b. Mustafa, Mustafa b. Ahmed.