Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 235 Hüküm no: 235 Orijinal metin no: [34a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman b. Süleyman’ın Papa Sahak v. Arbeton ve Nikogoz v. Onan’la cariye davasından men edildiği El-emru hasbemâ yahvîhi nemakahu’l-fakīr ileyhi sübhânehû el-Hâc Mustafa el-Kādî bi-medîne-i Galata el-mahrûse -gufira lehû-. Mahmiye-i İstanbul’da Mahmud Paşa kurbünde ber-vech-i müsâferet sâkin olan esirci tâifesinden Osman b. Süleyman nâm kimesne mahmiye-i İstanbul’da hazreti sadr-ı a‘zamîde ma‘kūd meclis-i şer‘de işbu hâmilü’r-rakīm Papa Sahak v. Arbeton ve cemâ‘at-başıları Nikogoz v. Onan nâm Ermeniler muvâcehelerinde üzerlerine da‘vâ ve takrîr-i kelâm edip ben târih-i kitâbdan on beş gün mukaddem yedimde mâlım ve mülküm olan ma‘lûmetü’l-evsâf bir re’s Ermeniyye Acem câriyemi merkūmân Sahak ve Nikogoz’a ale’l-iştirâki’s-seviy iki yüz otuz guruşa bâtten bey‘ u teslîm edip onlar dahi ber-minvâl-i muharrer iştirâken iştirâ ve tesellüm ve kabûl etmeleriyle hâlâ semen-i merkūmu merkūmândan taleb ve da‘vâ eylediğimde vermede ta‘allül ederler suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ikāmet eylediği Ali b. Mehmed ve el-Hâc Ali b. Ahmed ve Hasan b. Veli nâm kimesneler vech-i şer‘î üzere edâ-i şehâdet-i şer‘iyye edemediklerinden nâşî cerh olunup ba‘dehû müdde‘î-i mezbûrdan şâhid-i âhar taleb olundukda ityân-ı beyyineden izhâr-ı acziyle isre’l-istihlâf ve ba‘de’l-halefi’ş-şer‘î mûcebiyle müdde‘î-i mezbûr Osman merkūmân Papa Sahak ve Nikogoz’a bî-vech mu‘ârazadan men‘ birle mâ-hüve’l-vâkı‘ bi’l-ibtigā ketb olundu. Fi’l-yevmi’r-râbi‘ min-Zilka‘deti’ş-şerîfe sene 1137. Şuhûdü’l-hâl: Çukadâr el-Hâc Mehmed b. Mehmed, Halil Çelebi b. Mustafa, Bekir b. Hüseyin, İbrahim b. Mustafa, Ali b. Ahmed, Mehmed b. Ahmed.