Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 236 Hüküm no: 236 Orijinal metin no: [34a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Ahmed’i bıçakla yaralayan el-Hâc Ahmed b. Mehmed’in suçunu itiraf ettiği Mahrûse-i Galata hâricinde Kamer Hâtun mahallesinde sâkin Mehmed b. Ahmed b. Mehmed nâm kimesnenin anası ve tarafından zikri âtî da‘vâya vekîli olduğu es-Seyyid Ali b. Mustafa ve Mehmed b. Ali nâm kimesneler şehâdetleriyle şer‘an sâbit olan işbu râfi‘u’l-vesîka Saime bt. Ahmed nâm hâtun meclis-i şer‘de el-Hâc Ahmed b. Mehmed nâm kimesne mahzarında bi’l-vekâle üzerine da‘vâ ve takrîr-i kelâm edip târih-i kitâbdan dört gün mukaddem vakt-i zuhrda mahalle-i mezbûrede vâki‘ Hamam külhanı karşısında oğlum müvekkil-i mezbûr Mehmed’i amden bi-gayrı hakkın bıçak ile husyetinden ve sağ budundan iki yerinden darb ve cerh etmeğle mezbûr el-Hâc Mehmed’den suâl olunub mûceb-i şer‘îsi icrâ olunmak murâdımdır gıbbe’s-suâl mezbûr el-Hâc Ahmed cevâbında fi’l-vâki‘ dört gün mukaddem ber-vech-i muharrer mahall-i mezbûrda müvekkil-i mezbûr Mehmed b. Ahmed b. Mehmed’i amden bi-gayrı hakkın bıçak ile husyetinden ve sağ budundan iki yerinden darb ve cerh eylediğini ikrâr ve i‘tirâf etmeğin mûcebi ber’-i tâmma tevkīf olunup mâ-vaka‘a bi’l-ibtigā ketb olundu. Fi’l-yevmi’l-hâmis min-Zilka‘deti’ş-şerîfe sene 1137. Şuhûdü’l-hâl: Ali Kapudan b. Abdullah, Mehmed Beşe b. Hasan, Bayrakdar Hüseyin Beşe b. Hasan, Ali Beşe b. Mustafa, Ali Beşe b. Mehmed, İbrahim b. Mustafa.