Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 236 Hüküm no: 237 Orijinal metin no: [34a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. el-Hâc Ahmed’in kardeşi İbrahim Çelebi b. el-Hâc Ahmed’le müşterek menzildeki hissesini İbrahim Çelebi’ye sattığı Mahrûse-i Galata muzâfâtından kasaba-i Tophane[de] el-Hâc Memi mahallesinde sâkine Emine bt. el-Hâc Ahmed b. Sırrı nâm hâtunun li-ebeveyn karındaşı ve tarafından bey‘-i âti’z-zikre vekîli olduğu zât-ı mezbûreyi ma‘rifet-i şer‘iyye ile ârifân Misvkcı Mustafa Çelebi b. Yusuf ve İsmail Beşe b. Ali nâm kimesneler şehâdetleriyle mahzar-ı hasmda sâbit ve vekâletine hükm-i şer‘î lâhik olan İbrahim Çelebi b. el-Hâc Ahmed nâm kimesne meclis-i şer‘de işbu râfi‘u’l-kitâb es-Seyyid İbrahim Çelebi b. es-Seyyid Ali nâm kimesne mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin mahalle-i mezbûrede vâki‘ bir tarafdan Ahmed Beşe menzili ve bir tarafdan ba‘zen Mehmed Ağa menzili ve ba‘zen tarîk-i hâss ve bir tarafdan Topcular Kâtibi Mehmed Efendi menzili ve bir tarafdan Venedik elçisi menzili ile mahdûd tahtânî bir bâb oda ve bir sofa ve bi’r-i mâ ve kenîf ve bir mikdâr bahçeyi müştemil mülk menzilin nısf-ı şâyi‘i müvekkilem mezbûre Emine Hâtun’un ve nısf-ı şâyi‘-i âharı mezbûr es-Seyyid İbrahim’in ale’l-iştirâki’s-seviy mülkleri olmağla kız karındaşım müvekkile-i mezbûre Emine Hâtun dahi nısf hisse-i şâyi‘asını tarafeynden îcab ve kabûlü hâvî bey‘-i bâtt-ı sahîh-i şer‘î ile mezbûr es-Seyyid İbrahim’e kırk guruşa bey‘ u temlîk ve teslîm eyledikde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr kırk guruşu mezbûr es-Seyyid İbrahim Çelebi yedinden tamâmen ahz u kabz eyledi ba‘de’l-yevm menzil-i mahdûd-ı mezkûrun mecmû‘u mezbûr es-Seyyid İbrahim’in mülkü olup kız karındaşım müvekkile-i mezbûrenin kat‘an alâka ve medhali kalmamışdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis min-Zilka‘deti’ş-şerîfe sene 1137. Şuhûdü’l-hâl: Cüzdancı el-Hâc Mustafa, Sepetci İsmail Beşe b. Siyavuş, Halil Çelebi b. Mustafa, İbrahim b. Mustafa, Yusuf b. Abdullah, Mustafa b. Ahmed, Mehmed b. Ahmed, Ali b. Ahmed.