Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 237 Hüküm no: 238 Orijinal metin no: [34a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hazinedarzade es-Seyyid Osman Ağa’nın istiğlâl yoluyla Mustafa Çelebi b. el-Hâc Mehmed’den ödünç para aldığı Mahrûse-i Galata’da Arab Câmi‘i mahallesinde sâkin Hazinedarzâde es-Seyyid Osman Ağa b. Mehmed Ağa mahfil-i şer‘de merhûm es-Seyyid Ali Efendi eytâmının vasîleri işbu râfi‘u’l-vesîka Mustafa Çelebi b. el-Hâc Mehmed mahzarında ikrâr ve takrîr-i kelâm edip akd-i âtî sudûruna değin yedimde mülküm olup mahalle-i merkūmede vâki‘ bir tarafdan Kapıcızâde Ahmed Bey mülkü ve bir tarafdan benim bahçem ve iki tarafdan cidâr-ı hısn ve tarîk-i âm ile mahdûd dâhiliye-i ulyâda üç bâb oda ve bir sofa ve bir kule odası ve bir kilâr vüstâda bir matbah ve bir camekân ve iki halvetli bir hamâm ve tahtında bir mahzen ve bi’r-i mâ ve kenîf ve bir mikdâr arsa ve hâricen fevkānî üç bâb oda ve dehlîzi müştemil mülk menzilimi vasiyy-i mezbûr Mustafa Çelebi’ye bi-tarîki’l-istiğlâl üç yüz guruşa bey‘ u teslîm eylediğimde ol dahi ber-vech-i muharrer iştirâ ve tesellüm ve kabûl eyleyip semen-i merkūm üç yüz guruşu merhûm-ı mezbûrun eytâmı mâlından olmak üzere vasiyy-i mezbûr yedinden tamâmen ahz u kabz eylediğimden sonra vasiyy-i mezbûr Mustafa Çelebi menzil-i mahdûd-ı merkūmu ba‘de’t-tahliyeti’ş-şer‘iyye ve’t-tekābuzi’l-mer‘î senede kırk beş guruşa olmak üzere işbu târih-i kitâb senesi Zilka‘desi gurresinden üç sene tamâmına dek cem‘an yüz otuz beş guruşa akd-i vâhid ile bana îcâr ve teslîm edip ben dahi ber-vech-i muharrer istîcâr ve tesellüm ve kabûl eyledim dedikde gıbbe’t-tasdîki’ş-şer‘î mezbûr es-Seyyid Osman Ağa yine meclis-i mezkûrda vasiyy-i mezbûr Mustafa Çelebi mahzarında takrîr-i kelâm edip eğer benim için müddet-i merkūme tamâmına dek meblağ-ı mezbûr üç yüz guruş ile menzil-i merkūmun ücret-i lâzımesini vasiyy-i mezbûra edâ mümkün olmazsa menzil-i mahdûd-ı merkūmu semen-i misli ile âhara bey‘a ve semenini ahz u kabz ve deyn-i merkūm vasiyy-i mezbûra edâ ve teslîme ve fazlasını bana îsâle ve noksânı terettüb ederse noksânı ben mâlımdan tekmîl eylemek üzere tarafımdan işbu hâzır bi’l-meclis Mehmed Ağa b. el-Hâc İsmail Ağa’yı azl ve in‘izâlden masûne vekâlet-i devriye-i şer‘iyye vekîl ve nâib-i menâb nasb ve ta‘yîn eyledim dedikde mezbûr Mehmed Ağa dahi ber-vech-i meşrûh vekâlet-i merkūmeyi kabûl ve hıdemât-ı lâzimesini mahallinde ikāmete ta‘ahhüd etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis min-Zilka‘deti’ş-şerîfe sene 1137. Şuhûdü’l-hâl: İbrahim Ağa b. Halil, Kapıcızâde Ahmed Bey, es-Seyyid el-Hâc Bekir Ağa, Yorgancı Halil Çelebi, el-Hâc Ömer b. el-Hâc Halil, Attar Hüseyin Çelebi b. Abdullah, Nazır Mehmed Çelebi b. ( ), el-Hâc İsmail Ağa b. Nuh.