Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 238 Hüküm no: 239 Orijinal metin no: [34b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Abdullah ile karısı Saliha bt. Abdullah’ın müşterek mülk menzillerini Mehmed b. Ramazan’a sattıkları Mahrûse-i Galata muzâfâtından kasaba-i Fındıklı’da İbrahim Efendi mahallesinde sâkin Mehmed Çelebi b. Abdullah nâm kimesne asâleten ve zevcesi Saliha bt. Abdullah b. Abdülmennân nâm hâtun tarafından bey‘-i âti’z-zikre vekîl olduğu zât-ı mezbûreyi ma‘rifet-i şer‘iyye ile ârifân Abdullah b. İbrahim ve Mustafa b. Mehmed nâm kimesneler şehâdetleriyle sâbit olmağla vekâleten mahfil-i şer‘de işbu râfi‘u’l-kitâb Mehmed b. Ramazan nâm kimesne mahzarında bi’l-asâle ve bi’l-vekâle ikrâr ve takrîr-i kelâm edip akd-i âti’z-zikrin sudûruna değin zevcem müvekkile-i mezbûre Saliha Hâtun ile ale’l-iştirâki’s-seviy silk-i mülkümde münselik olup mahalle-i mezbûrede vâki‘ ba‘zen Mustafa Efendi ve ba‘zen Fâtıma Hâtun menzilleri ve bir tarafdan ba‘zen Abdullah ve ba‘zen Saka Süleyman menzilleri ve bir tarafdan İbrahim Çelebi ve bir tarafdan tarîk-i âm ile mahdûd fevkānî iki bâb oda ve bir sofa ve dehlîz ve tahtında mahtab ve kenîf ve bi’r-i mâ ve eşcâr-ı müsmire ve gayr-i müsmireli bahçeyi müştemil mülk menzilimi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Mehmed’e bi’l-asâle ve bi’l-vekâle yüz seksen beş guruşa bey‘ u temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr seksen beş guruşu mezbûr Mehmed yedinden tamâmen ahz u kabz eyledim ba‘de’l-yevm menzil-i mahdûd-ı mezkûr bi-cemî‘i mâ yeştemilühû ve yahvîhi mezbûr Mehmed’in mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis min-Zilka‘deti’ş-şerîfe sene 1137. Şuhûdü’l-hâl: Ali Çelebi b. Mustafa, Hasan Beşe b. Mustafa, Hüseyin Beşe b. Hasan, Hasan b. Mehmed, Süleyman b. Hasan, Halil Çelebi b. Ali, İbrahim Çelebi b. Muharrem, Halil Çelebi b. Mustafa.