Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 239 Hüküm no: 240 Orijinal metin no: [34b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Corci v. Dimitraşko’nun boşandığı karısı Kokana bt. Aleksandrı ile çocuğu Aleksandrı’nın müşterek mülk menzillerini Fransanci Kozi v. Bogos’a sattıkları İngiliz tercümânlarından iken bundan akdem hâlik olan Corci v. Dimitraşko’nun verâseti zevce-i metrûkesi Kokona bt. Aleksandrı nâm Nasrâniye ile sulbî evlâdı Aleksandrı ve Petro ve Saltana’ya münhasıra olup kable’l-kısme merkūme Saltana dahi hâlike olup verâseti anası merkūme Kokona ile li-ebeveyn er karındaşları merkūmân Aleksandrı ve Petro’ya münhasıra olup kable’l-kısme merkūme Petro dahi hâlik olmağla verâseti anası merkūme Kokona ile li-ebeveyn er karındaşı mersûm Aleksandrı’ya münhasıra ve tashîh-i meseleleri bi-hükmi’l-münâsahati’ş-şer‘iyye 1440 sehimden i‘tibâr olunup sihâm-ı mezbûreden 425 sehmi merkūme Kokona’ya 1015 sehmi merkūm Aleksandrı isâbet eylediği lede’ş-şer‘i’l-enver zâhir ve mukarrer oldukdan sonra merkūm Aleksandrı asâleten mersûme Kokona tarafından bey‘-i câi’z-zikri ikrâra vekîl olduğu merkūmenin şahsını ma‘rifet-i şer‘iyye ile ârifân Haçer v. Yani ve Sanan v. Panos nâm Ermeniler şehâdetleriyle mahzar-ı hasm-ı münker-i şer‘îde sâbit ve vekâletine hükm-i şer‘î lâhik olan Batista v. Nikola nâm zimmî vekâleten meclis-i şer‘de işbu sâhibü’r-rakīm Horasancı Kozi v. Bogos nâm Ermeni muvâcehesinde her biri bi’l-asâle ve bi’l-vekâle ikrâr ve takrîr-i kelâm edip hâlik-i merkūm Corci’nin terekesinden olup mahrûse-i Galata’da Sultan Bayezid mahallesinde vâki‘ iki tarafdan Yusuf Ağa mülkü ve iki tarafdan tarîk-i âm ile mahdûd tabaka-i ulyâda bir bâb oda ve bir sofa ve tabaka-i vüstâda kezâlik bir bâb oda ve bir sofa ve süflâda bir matbah ve kenîf ve bi’r-i mâ ve sahrınc ve bir mikdâr havluyu müştemil mülk menzilimi merkūm Kozi’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile dört yüz yetmiş guruşa bey‘ u teslîm edip ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr dört yüz yetmiş guruşu müşterî-i merkūm Kozi yedinden bi-kadri hisesinâ tamâmen ahz u kabz eyledik ba‘de’l-yevm menzil-i mahdûd-ı mezkûr bi-cemî‘i mâ yeştemilühû ve yahvîhi merkūm Kozi’nin mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis min-Zilka‘deti’ş-şerîfe sene 1137. Şuhûdü’l-hâl: es-Seyyid İbrahim Çelebi b. es-Seyyid el-Hâc Ahmed, es-Seyyid Ali Çelebi b. Osman, Keresteci el-Hâc Hasan, el-Hâc Hüseyin b. Veli, Mahmud Ağa b. Mehmed, es-Seyyid el-Hâc Mahmud, el-Hâc Ömer b. Mehmed abacı, Mahmud Çelebi el-münâdî.