Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 240 Hüküm no: 241 Orijinal metin no: [34b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Ali’nin boşandığı kocası el-Hâc İbrahim b. Mustafa ile zimmetlerini ibra ettikleri Mahrûse-i Galata muzâfâtından kasaba-i Tophane’de Muhyiddin Efendi mahallesinde sâkine Fâtıma bt. Ali nâm hâtun zâtı ba‘de’t-ta‘rîfi’ş-şer‘î mahfil-i şer‘de zevc-i mutallıkı işbu râfi‘u’l-kitâb el-Hâc İbrahim b. Mustafa nâm kimesne mahzarında bi-tav‘ihâ ikrâr ve takrîr-i kelâm edip zevcim mezbûr el-Hâc İbrahim hâlâ beni tatlîk etmeğle zimmetinde mütekarrır ve ma‘kūdün-aleyh olan iki bin akçe mehr-i mü’eccelim ile nafaka-i iddet ve ma’ûnet-i süknâm için bi’t-terâzî ta‘yîn olunan dört yüz akçe ki cem‘an iki bin dört yüz akçe hakkımı mezbûr el-Hâc İbrahim işbu meclis-i şer‘de bana tamâmen edâ ve teslîm eyledikde ben dahi yedinden ahz u kabz eylediğimden sonra hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin min-Zilka‘deti’ş-şerîfe sene 1137. Şuhûdü’l-hâl: İbrahim Çelebi b. Süleyman, Halil Çelebi b. Mustafa, İbrahim b. Mustafa, Mustafa Çelebi b. Ahmed. Mehmed b. Ahmed ve gayrühum.