Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 795 Hüküm no: 1040 Orijinal metin no: [123b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Abdülgani’nin kendisinden haksız yere cerime alındığı iddiasını ispatlayamadığı Fi’l-asl vilâyet-i Anadolu’da Kayseriye kazâsına tâbi‘ Carlak? nâm karye ahâlîsinden olup Mahmiye-i İstanbul’da Parmakkapısı kurbunda müsâfiren sâkin olan Ali b. Abdülganî nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb el-Hâc Mustafa b. el-Hâc Murtaza nâm kimesne mahzarında üzerine da‘vâ ve takrîr-i kelâm edip merkūm el-Hâc Mustafa târih-i kitâbdan on sekiz ay mukaddem karye-i mezbûre zâbiti iken cerîme nâmına bi gayrı hakkın yirmi esedî guruşumu ahz eylemişdir suâl olunup alıverilmesi matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin fi’l-vâki‘ târih-i kitâbdan on sekiz ay mukaddem karye-i mezbûre zâbiti iken müdde‘î Ali’nin cerîme nâmına bi gayrı hakkın yirmi esedî guruşunu ahz etmeyip elân üzerine reddi lâzım hakkı olmadığına merkūm el-Hâc Mustafa’ya yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince merkūm Ali bilâ-beyyine mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min Şevvâli’l-mükerrem. Şuhûdü’l-hâl: Süleyman Çelebi [b.] Hasan, Resul [b.] Rıdvan, Abdi Çelebi [b.] Hüseyin, Mehmed b. Ramazan.