Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 795 Hüküm no: 1041 Orijinal metin no: [123b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rabia Hatun bt. Hasan’ın, Saçlı Emir Zâviyesi’ne ait mukātaalı arsasını mütevelli izni ile Mehmed Efendi’ye devrettiği Mahmiye-i İstanbul’da Alayköşkü kurbunda Karekî Hüseyin Çelebi mahallesinde sâkine Râbia Hâtun bt. Hasan meclis-i şer‘-i şerîf-i Ahmedî ve mahfil-i dîn-i münîf-i Muhammedî’de bâ‘isetü’l-vesîka umdetü’l-muhadderât Sâliha bt. Abdullah’ın sadrî kebîr oğlu ve tarafından husûs-ı âti’l-beyânı tasdîka sâbitü’l-vekâle vekîl olan Mehmed Efendi b. eş-Şeyh Aydın Efendi mahzarında ikrâr ve takrîr-i kelâm edip mahalle-i mezbûrede vâki‘ Saçlı Emir zâviyesi toprağında, bir tarafdan mescid-i şerîf ve bir tarafdan mezbûr Saçlı Emir zâviyesi ve bir tarafdan tarîk-i âm ile mahdûd senede zâviye-i mezbûreye yüz akçe mukāta‘ası olup tasarrufumda olan arsamın hakk-ı tasarrufunu ma‘rifet-i mütevellî ile beş yüz akçe bedel mukābelesinde müvekkile-i mezbûreye ferâğ ve tefvîz ol dahi tefevvuz [ve] kabûl eyledikden sonra bedel-i mezbûru yedinden tamâmen ahz u kabz eyledim ba‘de’l-yevm arsa-i mahdûde-i mezbûre hakk-ı müfevvazıdır keyfe mâ teşâ’ mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis aşer min Şevvâli’l-mükerrem. Şuhûdü’l-hâl: Abdullah Efendi, Abdullah b. Rıdvan, Ahmed Çelebi b. Abdurrahman, el-Hâc Hüseyin, Siyavuş b. ( ) Ağa, Hasan Efendi el-Kâtib.