Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 240 Hüküm no: 242 Orijinal metin no: [34b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye bt. Abdullah’ın istiğlâl yoluyla el-Hâc Ömer Efendi b. Mehmed’den ödünç para aldığı Mahrûse-i Galata muzâfâtından kasaba-i Fındıklı’da Selime Hâtun mahallesinde sâkine [Zeyneb ve]Safiye bt. Abdullah nâm hâtunlar zâtları ba‘de’t-ta‘rîfi’ş-şer‘î meclis-i şer‘de mahrûse-i mezbûrede Arab Câmi‘-i Şerîfi mahallesi avârızına mevkūfe nükūdun bi’l-fi‘il mütevellîsi olan işbu râfi‘u’l-kitâb el-Hâc Ömer Efendi b. Mehmed nâm kimesne mahzarında her biri ikrâr ve takrîr-i kelâm edip ale’l-iştirâki’s-seviy silk-i mülkümde münselik olup sâbıku’z-zikr Selime Hâtun mahallesinde vâki‘ bir tarafdan el-Hâc Hasan mülkü ve iki tarafdan Abdullah Efendi ve Ali Ağa mülkleri ve bir tarafdan tarîk-i hâs ile mahdûd fevkānî iki bâb oda ve bir sofa ve dehlîz ve tahtânî bir bâb oda ve kenîf ve bahçe ve müşterek bi’r-i mâ ve sokak kapısını müştemil mülk menzilimizi mütevellî-i mezbûr el-Hâc Ömer Efendi’ye bi-tarîki’l-istiğlâl elli guruşa bey‘ u teslîm edip < >yedinde olan mâl-ı vakf-ı mezbûr ile ber-vech-i muharrer iştirâ ve tesellüm eyledikden sonra meblağ-ı mezbûr elli guruşu mâl-i vakf-ı mezbûrdan olmak üzere mütevellî-i mezbûr el-Hâc Ömer Efendi yedinden ahz u kabz eylediğimizden sonra mütevellî-i mezbûr menzil-i mahdûd-ı mezkûru ba‘de’t-tahliyeti’ş-şer‘iyye ve’t-tekābuzü’l-mer‘î târih-i kitâbdan bir sene tamâmına dek yedi buçuk guruşa <> îcâr ve teslîm eyledikde biz dahi ber-vech-i muharrer istîcâr ve kabûl eyledik dediklerinde gıbbe’t-tasdîki’ş-şer‘î mezbûretân Zeyneb ve Safiye meclis-i mezbûrda Bursavi Mehmed Çelebi b. Ahmed mahzarında her biri ikrâr ve takrîr-i kelâm edip ecel-i mezbûr hulûlünde bizim için edâ-i deyn ve fekk-i istiğlâl mümkün olmazsa menzil-i mahdûd-ı mezkûru semen-i misli ile âhara bey‘ ve kabz-ı semene ve semen-i mezbûr ile deyn-i mezkûrumuzu edâya fazla kalırsa bize îsâle ve umûr-ı mezkûra mütevakkıfe olduğu husûsların küllîsine azil ve in‘izâlden masûne vekâlet-i devriye-i şer‘iyye ile mezbûr Mehmed Çelebi’yi tarafımızdan vekîl ve nâib-i menâb nasb ve ta‘yîn eyledik dediklerinde mezbûr Mehmed Çelebi dahi ber-vech-i muharrer vekâlet-i mezbûreyi kabûl ve hıdemât-ı lâzimesini mahallinde ikāmete ta‘ahhüd etmeğin mâ-hüve’l-vâkı‘ bi’l-ibtigā ketb olundu. Fî-gurre-i Zilka‘deti’ş-şerîfe sene 1137. Şuhûdü’l-hâl: İbrahim Çelebi b. Muharrem, Halil Çelebi b. Mustafa, İbrahim b. Mustafa, Mustafa b. Ahmed, Mehmed b. Ahmed, Ali b. Ahmed.