Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 241 Hüküm no: 243 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah’ın boşandığı kocası Mehmed b. Abdullah’tan alacağına karşılık mülk menzilini kabul ettiği Mahrûse-i Galata’da Alacamescid mahallesinde sâkine Âişe bt. Abdullah nâm hâtun zâtı ba‘de’t-ta‘rîfi’ş-şer‘î mahfil-i şer‘de işbu râfi‘u’l-vesîka Mehmed b. Abdullah nâm kimesne bi-tav‘ihâ ikrâr ve takrîr-i kelâm edip mezbûr Mehmed zevcim olup târih-i kitâb günü beni bâyinen tatlîk etmeğle zimmetinde mütekarrır ve ma‘kūdün aleyh olan bin akçe mehr-i mü’eccelim ile nafaka-i iddet ve me’ûnet-i süknâm için bi’r-rızâ ta‘yîn olunan üç yüz akçe ki cem‘an bin üç yüz akçe mukābelesinde icâre-i mu‘accele ve mü’eccele ile tasarrufunda olup mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd Ayasofya-i Sagīr Vakfı’ndan bir bâb fevkānî oda ve bir sofa ve dehlîz ve kenîfi müştemil vakıf menzilini bâ-ma‘rifet-i mütevellî bana ferâğ ve tefvîz ben dahi tefevvüz ve kabûl eylediğimden sonra hukūk-ı zevciyyete müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin min-Zilka‘deti’ş-şerîfe sene 1137. Şuhûdü’l-hâl: Mehmed b. Ömer, Hallac Mehmed Beşe, İbrahim b. Mustafa, İbrahim b. Süleyman, Mustafa b. Ahmed.