Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 241 Hüküm no: 244 Orijinal metin no: [35a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Taşcızade eş-Şeyh el-Hâc Mehmed Efendi’nin menzil hissesini kardeşi Feyzullah’a satarak borcundan fazla gelen kısmını tahsil ettiği Mahrûse-i Galata’da el-Hâc A‘mâ mahallesinde sâkin Taşcızâde eş-Şeyh el-Hâc Mehmed Efendi b. eş-Şeyh Mustafa Efendi nâm kimesne meclis-i şer‘de li-ebin er karındaşı Feyzullah nâm sağīrin anası ve tesviye-i umûrunu rü’yete kıbel-i şer‘den mansûb vasîsi olan işbu râfi‘atü’l-vesîka Emine bt. Hasan nâm hâtun mahzarında ikrâr ve takrîr-i kelâm edip benim sagīre-i mezbûra ber-mûceb-i i‘lâm bedel-i sulhdan on beş bin altı yüz akçe deynim olmağla babamız müteveffâ eş-Şeyh Mustafa Efendi’nin terekesinden yedimizde olan keşif hücceti mûcebince sekiz sehimden iki sehimi karındaşım sagīr-i mezbûr Feyzullah’ın ve bir sehmi benim hisseme ta‘yîn ve tahsîs olunup mahalle-i mezbûrede vâki‘ bir tarafdan karındaşlarımız Molla Abdurrahim ve sagīr Ali hisselerine ta‘yîn olunan mahal ve bir tarafdan İsmail Çelebi menzili ve bir tarafdan ba‘zen Abdullah ve ba‘zen es-Seyyid Hüseyin ve ba‘zen Mehmed Reis menzilleri ve tarîk-i hâs ile mahdûd tabaka-i ulyâda bir bâb oda ve tahtında bir bâb harâb bi’r-i mâ ve kenîf ve bir mikdâr arsa-i hâliye ve müşterek sokak kapısını müştemil mülk menzilde olan bir sehm hisse-i irsiyye-i şer‘iyyemi tarafeynden îcâb ve kabûlü hâvî bey‘-i bâtt-ı sahîh-i şer‘î ile sagīr-i mezbûr için vasiyye-i mezbûreye on bir bin yedi yüz otuz iki akçeye bey‘ u teslîm ve merhûm Şa‘ban Aga nâm sâhibü’l-hayrın vakfından yevmî iki akçe mutasarrıf olduğum salât-hânlık cihetimi dahi üç bin yüz sekiz akçe bedel mukābelesinde sagīr-i mezbûr Feyzullah’a ferâğ ve tefvîz eylediğimde ol dahi ber-vech-i muharrer sagīr-i mezbûr için iştirâ ve tesellüm ve tefevvüz ve kabûl eyledikden sonra semen-i mezkûr ile bedel-i ferâğ-ı mezbûr cem‘an on dört bin yüz kırk akçeyi ber-mûceb-i i‘lâm deynim olan beş bin altı yüz akçenin mikdâr-ı mezkûruna takās eylediğimde <> vasiye-i mezbûre dahi mukāssa ve kabûl eyleyip mâ‘adâsı olan yedi yüz altmış akçeyi dahi vasiye-i mezbûre yedinden tamâmen ahz u kabz etmeğin ba‘de’l-yevm menzil-i mahdûd-ı mezkûrda olan bir sehm hisse-i şâyi‘am sagīr-i mezbûrun mülk-i müşterâsı ve yevmî iki akçe cihet-i mezbûra hakk-ı müfevvezi olmuşdur benim kat‘an alâka ve medhalim kalmayıp deynim olan meblağ-ı mezbûra ve menzil-i mahdûd-ı mezkûra ve babamız müteveffâ-yı mezbûr eş-Şeyh Mustafa Efendi’nin kalîl ü kesîr ve celîl ü hakīr terekesine müte‘allika âmme-i da‘âvî ve mutâlebât ve eymân ve muhâsamâtdan her birimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis ve’l-ışrîn min-Şa‘bâni’l-mu‘azzam sene 1137. Şuhûdü’l-hâl: el-Hâc Mehmed b. el-Hâc Osman, Ahmed Kadupân b. Mustafa, Osman Çelebi b. İbrahim, Münadi Süleyman Çelebi b. Mehmed, Hasan Çavuş b. Mehmed, Ahmed Çelebi b. Mehmed, Mustafa Çelebi b. Hüseyin, Molla Mehmed b. Ahmed.