Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 243 Hüküm no: 245 Orijinal metin no: [35a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Ahmed’in kendisini bıçakla yaralayan el-Hâc Ahmed b. Mehmed ile sulh olduğu Mahrûse-i Galata hâricinde Kamer Hâtun mahallesinde sâkin Mehmed b. Ahmed b. Mehmed Ali nâm kimesnenin anası ve tarafından zikri âtî sulh ve ibrâyı ikrâra vekîl olduğu Mustafa Çelebi b. Ahmed ve Ali Çelebi b. Veli nâm kimesneler şehâdetleriyle sâbit olan Saime bt. Ahmed nâm hâtun meclis-i şer‘de işbu râfi‘u’l-kitâb el-Hâc Ahmed b. Mehmed nâm kimesne bi’l-vekâle ikrâr ve takrîr-i kelâm edip mezbûr el-Hâc Ahmed târih-i kitâbdan on gün mukaddem oğlum müvekkil-i mezbûr Mehmed’i mahrûse-i mezbûre hâricinde Kalafatcıbaşı mahallesinde vâki‘ hamâm kurbünde sağ budundan ve husyetinden bi-gayrı hakkın darb ve cerh etmeğle mûceb-i şer‘îsini mezbûr el-Hâc Ahmed’den ba‘de’d-da‘vâ ve’l-ikrâr mûcebi bir’-i tâmme tevfîk olunmuş idi el-hâletü hâzihî beylerine muslihûn tavassut edip da‘vâ-yı mezkûresinden oğlum müvekkil-i mezbûru mezbûr el-Hâc Ahmed ile otuz beş guruş üzerine inşâ-i akd-i sulh eylediklerinde oğlum müvekkil-i mezbûr dahi sulh-i mezbûru kabûl ve bedel-i sulh olan mablağ-ı mezbûr otuz beş guruşu mezbûr el-Hâc Ahmed yedinden bi’t-tamâm ve’l-kemâl ahz u kabz eylediğinden sonra cerh-i mezkûra ve mâ yahdesü anhuya müte‘allika âmme-i da‘vâdan mezbûr el-Hâc Ahmed’in zimmetini ibrâ ve ıskāt eyledikde ol dahi bedel-i sulh-i mezbûr otuz beş guruşa müte‘allika âmme-i da‘vâdan oğlum müvekkil-i mezbûr Mehmed’in ve benim zimmetimi ibrâ ve ıskāt eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâdî aşer min-Zilka‘deti’ş-şerîfe sene 1137. Şuhûdü’l-hâl: Müezzin Molla Hüseyin b. Habib, Halil Çelebi b. Veli, es-Seyyid Ali Çelebi b. el-Hâc Mustafa, Haseki Mustafa Ağa, Mustafa Beşe b. Ali, Halil Beşe b. Mustafa, Mehmed Beşe Hüseyin, Ali Beşe b. Veli.