Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 243 Hüküm no: 246 Orijinal metin no: [35a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf b. Abdullah ile karısı Hadice bt. Abdülkerim’in müşterek menzil arsalarını Saliha Hatun bt. Abdullah’a sattıkları Mahrûse-i Galata hâricinde Fındıklı kasabasında vâki‘ İbrahim Efendi mahallesinde sâkin Yusuf b. Abdullah nâm kimesne kendi tarafından asâleten ve zevcesi Hadice bt. Abdülkerîm b. Abdullah nâm hâtun tarafından bey‘-i âti’z-zikri ikrâra vekîli olduğu merkūmenin zâtını ma‘rifet-i şer‘iyye ile ârifân İbrahim Çelebi b. Muharrem ve Hüseyin b. Abdullah şehâdetleriyle sâbit olmağla vekâleten meclis-i şer‘de mahalle-i mezbûrede sâkine işbu râfi‘atü’l-vesîka Saliha Hâtun bt. Abdullah b. Abdurrahim tarafından ikrâr-ı câi’z-zikri tasdîka vekîl-i sâbitü’l-vekâlesi olan zevci Mehmed b. Mahmud mahzarında bi’l-asâle ve bi’l-vekâle ikrâr ve takrîr-i kelâm edip akd-i âtî sudûruna değin zevcem müvekkile-i mezbûre Hadice Hâtun ile yedimizde ale’l-iştirâki’s-seviy mülkümüz olup mahalle-i merkūmede vâki‘ bir tarafdan ba‘zen Ali Beşe ve ba‘zen Abdullah mülkleri ve bir tarafdan ba‘zen müvekkile-i merkūme Saliha Hâtun ve ba‘zen Fâtıma Hâtun mülkleri ve bir tarafdan defter emîni ahuru ve bir tarafdan tarîk-i âm ile mahdûd mülk-i müşterâ menzil arsamızı bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkile-i merkūme Saliha Hâtun’a kırk guruşa bey‘ u teslîm eylediğimizde ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûru her birimiz bi-kadri’l-hısas müvekkile-i mezbûre yedinden tamâmen alıp kabz ba‘de’l-yevm arsa-i mahdûde-i mezbûre bi-cümletin mâ yeştemilühâ ve yahvîhi müvekkile-i mezbûre Saliha Hâtun’un mülk-i müşterâsı olmuşdur keyfe mâ yeşâ ve yahtâr mutasarrıf olsun dediklerinde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fî-gurre-i Zilka‘deti’ş-şerîfe sene 1137. Şuhûdü’l-hâl: Serbölük Halil Çelebi, Baba Yusuf b. Abdullah, Süleyman b. Ahmed, Bekir Çelebi b. Ahmed, Sırmakeş Mustafa, Bursalı Muhzır Mehmed.