Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 244 Hüküm no: 247 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Kostantin ile Anderon v. Nikola’nın alacak davasında sulh oldukları Deryâ-yı Sefîd cezîrelerinden İskapolos cezîresi ahâlîsinden olup tüccâr tâifesinden Dimitri v. Kostantin nâm zimmî meclis-i şer‘de cezîre-i Rodos ahâlîsinden işbu râfi‘u’r-rakīm Anderon v. Nikola nâm zimmî muvâcehesinde ikrâr ve takrîr-i kelâm edip merkūm Anderon’a târih-i kitâbdan bir sene mukaddem Mısr-ı Kahire tarafından medîne-i Reşid’de selâmet ile İstanbul’a vardığımızda mâlımdan sana yüz guruş vereyim deyü da‘vâ eyleyip ba‘dehû selâmet ile İstanbul’a geldiğimde va‘d-i mezkûruma binâen meblağ-ı mezbûr yüz guruşu mezbûr Anderon’a def‘ u teslîm eylediğimde ol dahi bâ‘isü’l-vesîka ahz u kabz eylediğinden sonra ben meblağ-ı mezbûru mezbûr Anderon’a verdiğime nâdim olup ve meblağ-ı mezbûr yüz guruşu merkūm Anderon’dan taleb ve da‘vâ eylediğimde merkūm Anderon dahi ber-vech-i muharrer benden ancak doksan beş guruş ahzını ikrâr ziyâde beş guruş ahzını münkir olmağla beynimizde münâza‘ât-ı kesîre cereyân etmiş idi el-hâletü hâzihî merkūm Anderon ile beni da‘vâ-yı mezkûremden otuz guruş üzerine inşâ-i akd-i sulh etdiklerinde ben dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûr otuz guruşu mersûm Anderon yedinden bi’t-tamâm ve’l-kemâl ahz u kabz eylediğimden sonra mâ‘adâsı olan yetmiş guruşa müte‘allika âmme-i da‘vâdan merkūm Anderon’un zimmetini ibrâ-yı âmm ile ibrâ ve ıskāt eylediğimde ol dahi bedel-i sulh-i mezbûr otuz guruşa müte‘allika da‘vâdan benim zimmetimi ibrâ ve ıskāt eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-âşir min-Zilka‘deti’ş-şerîfe sene 1137. Şuhûdü’l-hâl: Mustafa b. Mehmed, İbrahim b. Muharrem, Halil Çelebi b. Mustafa, İbrahim b. Mustafa, Mustafa Çelebi b. Ahmed, Mehmed b. Ahmed.