Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 245 Hüküm no: 248 Orijinal metin no: [35b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah’ın eski kocası Mikail v. Corci’den alacak davasından men edildiği Mahrûse-i Galata hâricinde Müeyyedzâde mahallesinde sâkine olup zâtı İbrahim b. Mustafa ve Yusuf b. Abdullah ta‘rîfleriyle mu‘arrefe olan Âişe bt. Abdullah nâm mühtediye mahfil-i şer‘de zevc-i sâbıkı işbu hâmilü’r-rakīm Mikail v. Corci nâm zimmî muvâcehesinde üzerine da‘vâ ve takrîr-i kelâm edip târih-i kitâbdan dört sene mukaddem merkūm Mikail ile zevciyyet beynimizde kāime iken mâlımdan bir def‘a elli guruş ve bir def‘a otuz altı guruş ki cem‘an seksen altı guruş ikrâz ve teslîm ol dahi yedimden iktirâz ve tesellüm etmeğin hâlâ suâl olunup meblağ-ı mezbûrun alıverilmesi murâdımdır dedikde gıbbe’s-suâl merkūm Mikail cevâbında fi’l-vâki‘ müdde‘iyye-i merkūme Âişe yedinden ancak elli guruş ahzını ikrâr ziyâde kabzını inkâr eylediğinden mâ‘adâ meblağ-ı mezbûr elli guruşu yedimde olan hüccet-i şer‘iyye mantûkunca mezbûrenin emriyle masârıf-ı ma‘lûmesine harc ve sarf eylediğim cihetle müdde‘iyye-i mezbûre meblağ-ı mezbûra müte‘allika da‘vâdan zimmetimi ibrâ ve ıskāt eyledi deyü def‘le mukābele edicek gıbbe’l-istintâk fi’l-hakīka merkūm Mikail meblağ-ı mezbûr elli guruşu ber-minvâl-i muharrer emriyle masârıf-ı ma‘lûmesine sarf etmeğle meblağ-ı mezbûra müte‘allika da‘vâdan merkūmun zimmetini ibrâ ve ıskāt eylediğini mezbûre Âişe ikrâr ve i‘tirâf edip ve ba‘dehû meblağ-ı mezbûr otuz altı guruş için müdde‘î-i mersûmeden beyyine taleb olundukda bir vechile ikāmet-i beyyineye kādir olmayıp ve yemîn dahi vermemeğin mûcebiyle müdde‘î-i mezbûra bilâ vech-i şer‘î mersûm Mikail’e mu‘ârazadan men‘ birle mâ-hüve’l-vâkı‘ bi’t-taleb ketb olundu. Fi’l-yevmi’s-sâmin min-Zilka‘deti’ş-şerîfe sene 1137. Şuhûdü’l-hâl: İbrahim Çelebi b. Muharrem, Halil Çelebi b. Mustafa, Mustafa b. Receb, Ali b. Ahmed, Mehmed b. Ahmed Bursavi.