Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 245 Hüküm no: 249 Orijinal metin no: [35b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimo v. Tolovi ile gemi reisi Angeli’nin korsan baskını sonucu gasbedilen kahve yüküyle ilgili alacak davasında sulh oldukları Tüccâr tâifesinden Dimo v. Tolovi nâm zimmî meclis-i şer‘de sefîne reîslerinden işbu hâmilü’r-rakīm Angeli v. Yorgaki nâm zimmî muvâcehesinde bi-tav‘ihî ikrâr ve takrîr-i kelâm edip târih-i kitâbdan altı sene mukaddem ticâret ile Mısr-ı Kahire tarafında medîne-i İskenderiye’de reîs-i merkūma iki zenbil içinde cem‘an doksan dört vakiyye kahvemi navl-ı ma‘lûm ile İstanbul’a nakil için def‘ u teslîm eylediğimde ol dahi ber-vech-i muharrer ahz ve sefînesine vaz‘ ve İstanbul’a getirirken esnâ-yı tarîkde Yediburun nâm mahalde Malta keferesinden Burunsuz nâm harbî [kefere] müsâdife eyledikde merkūm Angeli sefînesini başdan kara edip ve içinde olan emvâl ve eşyâsını ve benim kahve dahi taşraya ihrâc ve kabz ve âhara bey‘le istihlâk eylemiş idi deyü da‘vâ eylediğimde ol dahi zikr olunan kahve sefîneden ihrâc olunmayıp harbî kefere ahz eyledi deyü ihrâcın inkâr ve ben müdde‘âmı kādir olmayıp merkūm Angeli Res’i tahlîf sadedinde iken beynimize muslihûn tavassut edip merkūm Angeli Reis ile beni fedâen li’l-yemîn otuz guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûr otuz guruşu mersûm Angeli Reis yedinden bi’t-tamâm ahz u kab eylediğimden sonra sâbıku’z-zikr kahveye müte‘allika âmme-i da‘vâdan merkūm Angeli Reis’in zimmetini ibrâ ve ıskāt eylediğimde ol dahi bedel-i sulh-i mezbûr otuz guruşa müte‘allika âmme-i da‘vâdan benim zimmetimi ibrâ ve ıskāt eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ min-Zilka‘deti’ş-şerîfe sene 1137. Şuhûdü’l-hâl: Salih Çavuş b. Mustafa, İbrahim b. Muharrem, Halil Çelebi b. Mustafa, Mustafa Beşe b. Ahmed, Mehmed b. Ahmed, Molla Mehmed b. Yusuf, Ali b. Ahmed.