Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 246 Hüküm no: 250 Orijinal metin no: [35b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki tarafından Acı Doka v. Lefter’e satılan mülk menzilin Acı Doka’nın varisleri tarafından Yanaki’ye iade edildiği Mahrûse-i Galata nevâhîsinden Beşiktaş nâhiyesine tâbi‘ Arnavud nâm karyede sâkin iken bundan akdem hâlik olan Acı Doka v. Lefter nâm zimmînin verâseti zevce-i metrûkesi Kurtişe bt. Kostantin nâm Nasrâniyeye ve sulbî kebîr oğulları Anaştaş ve Hristaki ve Dimitri ile sulbiye kebîre kızları Maryora ve Ergiri’ye münhasıra olup ba‘dehû mezbûr Dimitri dahi hâlik olmağla verâseti anası mezbûre Kurtişe ile li-ebeveyn karındaşları mezbûrûn Anaştaş ve Hristaki ve Maryora ve Ergiri’ye münhasıra olduğu lede’ş-şer‘i’l-enver zâhir ve mukarrer oldukdan sonra mezbûr Anaştaş ile sin ve cüssesinin hadd-i bulûğa tahammülü olup ve bulûğunu dahi mukır ve mu‘terif olan mezbûr Hristaki asâleten ve şahsı Drako v. Yani ve Hristo v. Antoni nâm zimmîler ta‘rîfleriyle mu‘arrefe olan mezbûre Kurtişe kendi tarafından asâleten ve mezbûretân Maryora ve Ergiri taraflarından husûs-ı âti’z-zikri ikrâra vekîl olduğu yine mezbûretânın şahıslarını ma‘rifet-i şer‘iyye ile ârifân mu‘arrefân-ı mezbûrân Drako ve Hristo şehâdetleriyle sâbit olmağla vekâleten meclis-i şer‘de hâlik-i mezbûrun li-ebeveyn karındaşı işbu hâmilü’r-rakīm Yanaki nâm zimmî muvâcehesinde her biri bi’l-asâle ve bi’l-vekâle ikrâr ve takrîr-i kelâm edip mezbûr Yanaki karye-i mebûrede vâki‘ bir tarafdan Andeya ve bir tarafdan Tamadi nâm zimmîler mülkleri ve tarafeynden tarîk-i âm ile mahdûd tabaka-i ulyâda iki bâb oda ve dehlîz vüstâda iki bâb oda ve dehlîzi ve süflâda mahzen ve kenîf ve müşterek bi’r-i mâyı müştemil mülk menzilini mukaddemâ mûrisimiz hâlik-i merkūm Acı Doka’ya <> dört yüz guruşa bey‘ edip lâkin bey‘-i mezbûr hakīkatde muvâza‘atan olmağla hâlâ biz akd-i mezbûru beynimizde ba‘de’l-fesh menzil-i mezbûru rızâmız ile yine mezbûr Yanaki’ye teslîm edip ol dahi ber-vech-i muharrer ahz u kabz eyledikden sonra menzil-i mezbûra müte‘allika âmme-i da‘vâdan mersûm Yanaki’nin zimmetini asâlet ve vekâlet-i mahkiyelerimiz hasebiyle ibrâ-i âmm-ı kātı‘u’n-nizâ‘la ibrâ ve ıskāt eyledik binâenaleyh menzil-i mahdûd-ı mezbûr ke’l-evvel mezbûr Yanaki’nin mülküdür keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ min-Zilka‘deti’ş-şerîfe sene 1137. Şuhûdü’l-hâl: Yağlıkcı Abdurrahman Ağa, Serbölük Halil Ağa, Serbölük İbrahim Çelebi, İbrahim b. Mustafa, Süleyman b. Ahmed, Kürkcü Tanaş, Terzi Nikolaki, Yanaki Reis, Kürkcü Roşo, Dimitraki.