Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 247 Hüküm no: 251 Orijinal metin no: [36a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki v. Lefter’in istiğlâl yoluyla Yağlıkcı Abdurrahman Ağa’dan ödünç para aldığı Mahrûse-i Galata’ya tâbi‘ Arnavud karyesi sükkânından Yanaki v. Lefter nâm zimmî meclis-i şer‘de işbu râfi‘u’l-vesîka Yağlıkcı Abdurrahman Ağa b. el-Hâc ( ) nâm kimesne mahzarında ikrâr ve takrîr-i kelâm edip akd-i âtî sudûruna değin yedimde mülküm olup karye-i mezbûrede vâki‘ bir tarafdan Andarya ve bir tarafdan Lahmari nâm zimmîler mülkleri ve tarafeynden tarîk-i âm ile mahdûd tabaka-i ulyâda iki bâb oda ve dehlîz ve vüstâda iki bâb oda ve dehlîz ve süflâda mahzen ve kenîf ve müşterek bi’r-i mâyı müştemil mülk menzilimi fâriğan ani’ş-şevâgil mezbûr Abdurrahman Ağa’ya bi-tarîki’l-istiğlâl üç yüz altmış guruşa bey‘ u teslîm eylediğimde ol dahi ber-vech-i muharrer ba‘de’l-iştirâ ve’t-tesellüm ve’l-kabûl semeni olan meblağ-ı mezbûr üç yüz altmış guruşu mezbûr Abdurrahman Ağa yedinden tamâmen ahz u kabz eylediğimden sonra mezbûr Abdurrahman Ağa menzil-i merkūmu ba‘de’t-tahliyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına değin bana kırk guruşa îcar ve tesellüm edip ben dahi ber-vech-i muharrer istîcâr ve kabûl eyledim dedikde gıbbe’t-tasdîki’ş-şer‘î mâ hüve’l-vâki bi’l-ibtigā ketb olundu. Fi’l-yevmi’t-tâsi‘ min-Zilka‘deti’ş-şerîfe sene 1137. Şuhûdü’l-hâl: Serbölük Halil Çelebi, Serbölük İbrahim Çelebi, İbrahim b. Mustafa, Mustafa b. Ahmed, Süleyman b. Ahmed, Ali Bey b. Abdullah, Mehmed b. Ahmed.