Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 796 Hüküm no: 1042 Orijinal metin no: [123b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Bey b. İbrahim’in, Ahmed Çelebi b. Mustafa’nın adamlarını ve câriyesini dövdüğü Medîne-i Hazret-i Ebî Eyyûb-i Ensârî -aleyhi’r-rahmetü’l-Bârî- nevâhîsinden Terkos nâhiyesine tâbi‘ Hacımihaliç nâm karye ahâlîsinden Ahmed Çelebi b. Mustafa ve Mustafa b. İbrahim ve İbrahim b. Resul ve Handan b. Abdullah nâm kimesneler taraflarından husûs-ı âti’l-beyâna vekîl olduğu bimâ hüve tarîki’s-sübût şer‘an sâbit olup mezbûr Ahmed Çelebi’nin çiftlik kethüdâsı olan Mustafa b. Sefer nâm kimesne meclis-i şer‘-i şerîf-i lâzımü’t-teşrîfde Ahmed Bey b. İbrahim nâm kimesne mahzarında üzerine da‘vâ ve takrîr-i kelâm edip bundan akdem mezbûr Ahmed Bey müvekkilim mezbûr Ahmed Çelebi’nin câriyesi Üftâde’yi birkaç kerre bi gayrı hakkın tabanca ile urup darb ve müvekkilim mezbûr Mustafa’nın miyâncısı olan Yuvan nâm zimmîyi dahi bi gayrı hakkın darb edip ve müvekkilim mezbûr Handan’ı dahi değnekle bi gayrı hakkın birkaç def‘a darb edip ve mezbûr Ahmed Bey’in emri ile kölesi müvekkilim mezbûr İbrahim’in çobanını bi gayrı hakkın darb etmişdir suâl olunup ihkāk-ı hak olunmak matlûbumdur dedikde gıbbe’s-suâl mezbûr Ahmed Bey cevâbında müvekkil-i mezbûr Ahmed Çelebi’nin câriyesi Üftâde’yi evimin kapısı yanında bulup itivermişdim ve müvekkil-i mezbûr İbrahim’i dahi bir çubuk ile birkaç def‘a darb etmişdim deyip mâ‘adâyı inkâr etmeğin mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’s-sâdis aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Fahrü’l-eşbâh Eyüb Ağa Kethüdâ-yı Hazret-i Efendi, Mehmed Bey b. Abdullah, Mehmed b. Ramazan, Hasan b. Abdullah.