Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 248 Hüküm no: 252 Orijinal metin no: [36a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panayot v. Tanaş’ın kaybolan eşyaları için Praşkova v. Paskal ile sulh olduğu Mahrûse-i Galata’da Sultan Bayezid mahallesinde sâkin Panayot v. Tanaş nâm şâbb-ı emred meclis-i şer‘de işbu hâmilü’r-rakīm Praşkova v. Paskal nâm zimmî muvâcehesinde ikrâr ve takrîr-i kelâm edip merkūm Praşkova bundan akdem yedi nefer refîki ile beni ayardıp dağa götürüp fi‘l-i şenî‘a kasd eylediklerinde ben dahi kendimi tahlîs murâd eylediğimde bir elmas yüzük ve bir mikdar akçe ve ba‘zı eşyâlarım zâyi‘ olmuş idi deyü merkūm Praşkova’dan da‘vâ sadedinde olduğumda beynimize muslihûn tavassut edip da‘vâ-yı mezkûremden beni mersûm Praşokva’nın gıyâbında babası işbu hâzır bi’l-meclis merkūm Paskal ile altmış guruş üzerine inşâ-i akd-i sulh eylediklerinde ben dahi ber vech-i muharrer sulh-i mezbûru kabûl ve bedel-i sulh olan meblağ-ı mezbûr altmış guruşu mersûm Paskal yedinden tamâmen ahz u kabz eylemiş idim hâlâ mersûm Praşkova zuhûr etmeğle bâlâda tahrîr olunan minvâl üzere husûs-ı merkūma ve mârrü’z-zikr elmas yüzüğe ve akçeye vesâir zâyi‘ olan eşyâlarıma müte‘allika âmme-i da‘vâdan mersûm Praşkova’nın zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde merkūmân Praşkova ve Paskal dahi bana medfû‘u olan bedel-i sulh merkūm altmış guruşa müte‘allika âmme-i da‘vâdan kezâlik benim zimmetimi ibrâ ve ıskāt eylediler dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis aşer min-Zilka‘deti’ş-şerîfe sene 1137. Şuhûdü’l-hâl: İbrahim Çelebi b. Muharrem, Halil Çelebi b. Mustafa, Deli İbrahim b. Mustafa, Baba Yusuf b. Abdullah, Ebûbekir b. Hüseyin, Lazari v. Lefter, Panayot v. Lofser, Manol v. İlya, Praşkova v. Yamandi, Palaş v. Koçi. David v. Koçi, Marino v. Kalya.