Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 248 Hüküm no: 253 Orijinal metin no: [36a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panayot v. Yani’nin diğer Panayot’ta olan alacağı varisleri adına tahsil edildiği Vilâyet-i Anadolu’da vâki‘ Trabzon kazâsı muzâfâtından Akçaabad nâhiyesine tâbi‘ Mersin nâm karye ahâlîsinden olup Soma kasabasında ticâret vechi üzere mütemekkin olduğu hâlde bundan akdem hâlik olan Panayot v. Yani v. Kiryako nâm zimmînin verâseti karye-i mezbûrede sâkine zevce-i metrûkesi Peruze bt. Kiryaki v. Yani ve anası Moskande bt. Papa Todori v. Yani nâm Nasrâniyelere ve sulbiye sagīre kızı Semireye ve li-ebeveyn er karındaşı Yorgi ile li-ebeveyn kız karındaşı Sofiye nâm nasrâniye ye münhasıra ve tashîh-i meselesi bi-hükmi’l-ferâiz yetmiş iki sehimden olmağla sihâm-ı mezbûreden 9 sehimi zevcesi merkūme Peruze’ye 12 sehmi anası mersûme Moskande’ye 36 sehmi kızı sagīre-i merkūme Semireye 10 sehmi er karındaşı merkūm Yorgi’ye 5 sehmi kız karındaşı merkūme Sofya’ya isâbet edip ve merkūme Peruze kızı sagīre-i merkūme Semireye’nin kıbel-i şer‘den mansûbe vasîsi olduğu lede’ş-şer‘i’l-enver zâhir oldukdan sonra merkūm Yorgi ile merkūmât Peruze ve Moskande ve Sofiye taraflarından zikri âtî meblağı taleb ve da‘vâya ve ahz u kabz ve kendülere îsâle ve lede’l-iktizâ sulh ve ibrâya vekîl olduğu ber-mûceb-i hüccet-i şer‘iyye sâbit olan Panayot v. Aleksi nâm zimmî meclis-i şer‘de abacı tâifesinden diğer Panayot v. Panol v. Kiryako nâm zimmînin karındaşı ve tarafından ikrâr-ı âti’z-zikri tasdîke vekîl-i şer‘îsi olan işbu râfi‘u’r-rakīm Tanaş v. Panol nâm zimmî muvâcehesinde bi’l-vekâle ikrâr ve takrîr-i kelâm edip hâlik-i merkūm Panayot’un mersûm diğer Panayot zimmetinde cihet-i karz-ı şer‘îden yüz seksen guruş hakkı olmağla meblağ-ı mezbûru kable’l-ahz hâlik olup meblağ-ı mezbûr verese-i mezkûresine mevrûs olmağın hâlâ ben meblağ-ı mezbûr yüz seksen guruşu verese-i mezkûre taraflarından vekâletim hasebiyle müvekkil-i mersûm diğer Panayot yedinden bi’t-tamâm ve’l-kemâl ahz u kabz eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis aşer min-Zilka‘deti’ş-şerîfe sene 1137. Şuhûdü’l-hâl: İbrahim Çelebi b. Halil, Ali Çelebi b. Ahmed, İbrahim Beşe b. Hüseyin, Halil Çelebi b. Mustafa, Kostantin v. Aleksi, Praşkova v. Simyon, Nikola v. Todori, Lazari v. Sofyano, Duka v. Yorgi, Panayot v. Yorgi.