Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 249 Hüküm no: 254 Orijinal metin no: [36a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panayot v. Yani’nin İstefan v. Yorgi’den alacağının vârisleri adına tahsil edildiği Vilâyet-i Anadolu’da vâki‘ Trabzon kazâsı muzâfâtından Akçaabad nâhiyesine tâbi‘ Mersin nâm karye ahâlîsinden olup Soma kasabasında ticaret vechi üzere mütemekkin olduğu hâlde bundan akdem hâlik olan Panayot v. Yani nâm zimmînin verâseti karye-i mezbûrede sâkine zevce-i metrûkesi Peruze bt. Kiryaki v. Yani ve anası Moskande bt. Papa Todori v. Yani nâm Nasrâniyelere ve sulbiye sagīre kızı Semireye ve li-ebeveyn er karındaşı Yorgi ile li-ebeveyn kız karındaşı Sofya nâm Nasrâniye ye münhasıra ve tashîh-i meselesi bi-hükmi’l-ferâiz yetmiş iki sehimden olmağla sihâm-ı mezbûreden 9 sehimi zevcesi merkūme Peruze’ye 12 sehmi anası mersûme Moskande’ye 36 sehmi kızı sagīre-i merkūme Semireye 10 sehmi er karındaşı merkūm Yorgi’ye 5 sehmi merkūme Sofya’ya isâbet edip ve merkūme Peruze kızı sagīre-i merkūme Semireye’nin kıbel-i şer‘den mansûbe vasîsi olduğu lede’ş-şer‘i’l-enver [36b] zâhir oldukdan sonra merkūm Yorgi ile merkūmât Peruzeve Moskande ve Sofya taraflarından zikri âtî meblağı taleb ve da‘vâ ve ahz u kabza ve kendülere îsâle ve lede’l-iktizâ sulh ve ibrâya vekîl olduğu ber-mûceb-i hüccet-i şer‘iyye sâbit olan Panayot v. Aleksi nâm zimmî meclis-i şer‘de abacı tâifesinden işbu râfi‘u’r-rakīm İstefan v. Yorgi nâm zimmî muvâcehesinde bi’l-vekâle ikrâr ve takrîr-i kelâm edip hâlik-i merkūmun merkūm İstafan zimmetinde cihet-i karz-ı şer‘îden yüz guruş hakkı olmağla meblağ-ı mezbûru kable’l-ahz hâlik olmağla meblağ-ı mezbûr verese-i mezkûresine mevrûs olmağın hâlâ ben meblağ-ı mezbûr yüz guruşu verese-i mezkûre taraflarından vekâletim hasebiyle mezbûr İstafan yedinden bi’t-tamâm ve’l-kemâl ahz u kabz eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’r-râbi‘ aşer min-Zilka‘deti’ş-şerîfe sene 1137. Şuhûdü’l-hâl: İbrahim Çelebi b. Halil, es-Sâbikūn