Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 250 Hüküm no: 255 Orijinal metin no: [36b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitraki v. Yani’nin varislerinin menzillerini Maryore bt. Acısaro’ya sattıkları Zikri âtî husûsun mahallinde ketb ü tahrîri için bi’l-iltimâs savb-ı şer‘-i enverden irsâl olunan mevlânâ Yahya Efendi b. Yusuf Efendi mahrûse-i Galata nevâhîsinden Beşiktaş nâhiyesine tâbi‘ Kuruçeşme nâm karye sâkinelerinden Maryore bt. Acısaro nâm Nasrâniyenin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf-i nebevî eyledikde karye-i mezbûre sükkânından iken bundan akdem hâlik olan Domaki v. Yani nâm zimmînin verâseti zevce-i metrûkesi Fruşne bt. Kostantin nâm Nasrâniyeye ve sulbî kebîr oğulları Kostantin ve İstefani ve Radokalo’ya ve sulbiye kebîre kızı diğer Maryore’ye münhasıra ve tashîh-i meseleleri bi-hükmi’l-ferâiz sekiz sehimden mu‘teber olup sihâm-ı mezbûreden bir sehmi mezbûre Fruşne’ye ve ikişer sehmi mezbûrûn Kostantin ve İstefani ve Radokalo’dan her birine ve bir sehmi mezbûre diğer Maryora’ya isâbeti tahakkukundan sonra mezbûr Radokalo asâleten ve merkūm Kostantin kendi tarafından asâleten ve karındaşı merkūm İstefani tarafından husûs-ı âti’z-zikri ikrâra vekîl olduğu Lefter v. Armiya ve Yalaki v. Dimitri nâm zimmîler şehâdetleriyle şer‘an sâbit olmağla vekâleten ve şahsı Kürkcübaşı Manolaki v. Yani ve Atmanca v. Çanto ta‘rîfleriyle mu‘arrefe olan mezbûre Fruşne kezâlik asâleten ve mezbûre diğer Maryora tarafından husûs-ı câi’l-beyânı ikrâra vekîli olduğu mezbûrenin şahsını ma‘rifet-i şer‘iyye ile ârifân Panayot v. Lefter ve Karabet v. Ariton nâm zimmîler şehâdetleriyle şer‘an sâbit olan mezbûre Lefter vekâleten meclis-i ma‘kūd-ı mezbûrda işbu râfi‘atü’l-vesîka mezbûre Maryore muvâcehesinde İngiltere Elçisi Baştercümânı Lokaki v. Grego tarafından sâbitü’l-vekâle vekîli Dimitri v. Praşkova hâzır olduğu hâlde her biri bi’l-asâle ve bi’l-vekâle ikrâr ve takrîr-i kelâm edip mûrisimiz hâlik-i merkūm Domaki’den bize mevrûs olup karye-i mezbûrede vâki‘ bir tarafdan leb-i deryâ ve bir tarafdan Boğdan Bey’i Mihal Voyvoda yalısı ve bir tarafdan Tabib Dimitraki yalısı ve taraf-ı râbi‘den tarîk-i âm ile mahdûd fevkānî sagīr ve kebîr dört bâb oda ve bir sofa ve tahtânî dört bâb oda ve bir matbah ve iki mahzen ve bi’r-i mâ ve kenîf ve ahur ve bir mikdâr bahçeyi müştemil yalı ta‘bîr olunur mülk menzili mukaddemâ cümlemiz merkūm Lokaki Tercümân yedinden istidâne ve kabz eylediğimiz bin beş yüz guruş mukābelesinde istiğlâl edip lâkin biz deyn-i mezbûru merkūm Lukaki’ye bi’t-tamâm edâ ve menzil-i mezbûru rehniyyetden fek ve kabz eylediğimizden sonra menzil-i mahdûd-ı merkūmu mezbûre Maryore’nin yedinde olan beş kıt‘a mübâya‘a hüccetleri nâtıka olduğu üzere cemî‘ tevâbi‘i ve kâffe-i merâfıkı ile tarafeynden îcâb ve kabûlü hâvî bey‘-i bâtt-ı sahîh-i şer‘î ile tashîh-i mezbûr üzere her birimiz hisselerimizi min-haysü’l-mecmû‘ yedi bin guruşa mezbûre Maryore’ye bey‘ u teslîm eylediğimizde ol dahi ber-vech-i muharrer ba‘de’l-iştirâ ve’t-tesellüm ve’l-kabûl semen-i merkūmu bi-kadri’l-hısas her birimiz yedinden tamâmen alıp kabz etmiş idik hâlâ biz menzil-i mezbûrun aynına ve semenine ve gabn-i fâhiş ve gabn-i tağrîrine müte‘allika âmme-i de‘âvî ve mutâlebât ve kâffe-i eymân ve muhâsamâtdan mezbûre Maryore’nin zimmetini her birimiz bi’l-asâle ve bi’l-vekâle ibrâ-i âmm-ı kātı‘u’n-nizâ‘la ibrâ ve ıskāt eyledik binâen aleyh menzil-i mahdûd-ı mezkûr bi-cümletin mâ yeştemilühû ve yahvîhi merkūme Maryore’nin mülk-i müşterâsı olup bizim kat‘an alâka ve medhalimiz kalmamışdır keyfemâ teşâ ve tahtâr mutasarrıfa olsun dedikde gıbbe’t-tasdîki’ş-şer‘î vâki‘-i hâli mevlânâ-yı mezkûr mahallinde ketb ü tahrîr ve ma‘an ba‘s olunan Çukadâr Mustafa Beşe ve Muhzır Mustafa ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’l-hâdî aşer min-Zilka‘deti’ş-şerîfe sene 1137. Şuhûdü’l-hâl: İmâm İbrahim Efendi b. Hüseyin, Mehmed Usta b. Hüseyin, Mustafa Ağa b. Hüseyin, İsmail b. Ali, Ahmed b. Ali, Ahmed b. Mehmed, Hüseyin b. Ahmed, el-Hâc Yusuf b. Abdullah, Ahmed Çelebi b. Abdurrahman, el-Hâc Mustafa b. Ya‘kub, Mustafa b. Abdurrahman, Mehmed b. Receb, Ahmed b. İbrahim, Mehmed b. Ali, el-Hâc Süleyman b. Mahmud.