Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 251 Hüküm no: 256 Orijinal metin no: [36b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hristodoli v. Yorgi’nin mülk menzilini el-Hâc Halil Ağa b. el-Hâc İbrahim’e sattığı Mahrûse-i Galata’da Sultan Bayezid mahallesinde sâkin Hristodoli v. Yorgi nâm zimmî meclis-i şer‘de işbu râfi‘u’l-vesîka el-Hâc Halil Ağa b. el-Hâc İbrahim nâm kimesne mahzarında bi-tav‘ihâ ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup mahalle-i mezbûrede vâki‘ bir tarafdan Yusuf Efendi menzili ve bir tarafdan Keresteci el-Hâc İbrahim menzili ve bir tarafdan Acıyani menzili ve bir tarafdan tarîk-i âm ile mahdûd fevkānî bir bâb oda ve dehlîz ve tahtıda bir bâb oda ve kenîf ve bi’r-i mâ ve bir mikdâr havluyu müştemil mülk menzilimi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr el-Hâc Halil Ağa’ya üç yüz guruşa bey‘ u temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr üç yüz guruşu mezbûr el-Hâc Halil Ağa yedinden tamâmen ahz u kabz eyledim ba‘de’l-yevm menzil-i mahdûd-ı mezkûr bi-cümletin mâ yeştemilehû ve yahviyehû mezbûr el-Hâc Halil Ağa’nın mülk-i müşterâsıdır keyfemâ teşâ ve tahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâdî aşer min-Zilka‘deti’ş-şerîfe sene 1137. Şuhûdü’l-hâl: Ahmed Ağa b. İbrahim, Hüseyin Efendi b. Abdurrahman, Ahmed Beşe b. Mehmed, Mehmed Yazıcı, Veli Beşe b. Ali, Mustafa Beşe b. Hüseyin, Serbölük İbrahim ve Hüseyin Ağa.