Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 252 Hüküm no: 257 Orijinal metin no: [37a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ariton v. Arakil’in Tanos v. Gregos’a toplam on bin yedi yüz yirmi akçe borcu kaldığı El-emru hasbemâ yahvîhi nemakahu’l-fakīr ileyhi sübhânehû el-Hâc Mustafa el-Kādî bi-medîne-i Galata -ufiye anhu-. Habbaz tâifesinden Ariton v. Arakil nâm Ermeni meclis-i şer‘de işbu hâmilü’r-rakīm Tanos v. Gregos nâm Ermeni muvâcehesinde ikrâr ve takrîr-i kelâm edip merkūm Tanos yedinden bundan akdem ahz ve âhara bey‘ ve kabz-ı semen eylediğim ekmek semeninden ba‘de külli hesâb altı bin dört yüz yirmi akçe ve cihet-i havâleden dahi dört bin akçe ki cem‘an on bin yedi yüz yirmi akçe zimmetimde deynim olmağla meblağayn-i mezbûreynden mâ‘adâ târih-i kitâba gelince beynimizde cereyân eden ahz u i‘tâya müte‘allika âmme-i da‘vâdan tarafeynden her birimiz âharın zimmetini ibrâ ve ıskāt eyledik ba‘de’l-yevm sâbıku’z-zikr on bin yedi yüz yirmi akçeden gayri bir birimiz ile kat‘an da‘vâ ve nizâ‘ımız kalmamışdır dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâdî aşer min-Zilka‘deti’ş-şerîfe sene [1]137. Şuhûdü’l-hâl: İbrahim Beşe b. Abdullah, Süleyman Beşe b. Fazlı, Halil Çelebi b. Mustafa, İbrahim b. Mustafa, Avanos v. Kirkor, Mardiros v. Tomas.