Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 256 Hüküm no: 263 Orijinal metin no: [37b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fransız tüccar Kuston v. Kuston’un menzilini Yeşuva v. Menahim isimli Ermeni’ye sattığı Mahrûse-i Galata dâhilinde vâki‘ Bereketzâde mahallesinde sâkin Fransız tüccârlarından Kuston v. Kuston tarafından menzil-i câi’z-zikri âhara bey‘ ve semenini ahz u kabz ve kendüye îsâle ve umûr-ı mezkûre mütevakkıfa olduğu husûsların küllîsine vekîli olduğu Yasakcı İbrahim Beşe b. Mahmud ve Ahmed Beşe b. Osman nâm kimesneler şehâdetleriyle mahzar-ı hasm-ı münkir-i şer‘îde şer‘an sâbit ve vekâletine hükm-i şer‘î lâhik olan yine Fransız tüccârlarından Davit Haci v. Agosti mahfil-i şer‘de işbu hâmilü’r-rakīm Yeşuva v. Menahim nâm Yahûdi muvâcehesinde Tercümân Franko hâzır olduğu hâlde bi’l-vekâle ikrâr ve takrîr-i kelâm edip akd-i âtî sudûruna değin müvekkilim gāib-i merkūm Kuston’un yedinde mülkü olup mahalle-i merkūmede vâki‘ bir tarafdan Lorihor v. Handarya menzili ve bir tarafdan İsak Yahûdi menzili ve iki tarafdan tarîk-i âm ile mahdûd ulyâda altı bâb oda ve vüstâda üç bâb oda ve bir sofa ve bir matbah süflâda iki mahzen ve fevkānî ve tahtânî bir bâb kârgir mahzen ve kenîf ve bir sahrınc ve bi’r-i mâ ve bir mikdâr havluyu müştemil olup arsasının senevî Ayasofya-i Kebîr Vakfı’na iki yüz akçe mukāta‘a-i kadîmesi olan mülk menzilini bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûl hâvî bey‘-i bâtt-ı sahîh-i şer‘î ile merkūm Yeşuva’ya vekâlet-i mahkiyem hasebiyle iki bin beş yüz guruşa bey‘ u teslîm eylediğimde ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr iki bin beş yüz guruşu müşterî-i merkūm yedinden bi’l-vekâle tamâmen alıp kabz eyledim ba‘de’l-yevm menzil-i mahdûd-ı mezkûr bi-cümletin mâ yeştemilühû ve yahvîhi müşterî-i merkūm Yeşuva’nın mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis aşer min-Zilka‘deti’ş-şerîfe sene [1]137. Şuhûdü’l-hâl: Gümrük Nazırı Ebûbekir Ağa, Gümrük Katibi İbrahim Efendi, Masdariye Nazırı İbrahim Beşe, Gümrük Kapıkethudâsı el-Hâc Ahmed, İbrahim Beşe b. Ali, Halil Efendi b. Hüseyin başkatib, Arusi Mustafa Efendi, Ali Efendi b. Ömer, Sipahi Ahmed Efendi.