Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 257 Hüküm no: 264 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Hamza’nın annesi Meryem bt. Hasan’dan satın aldığı menzilin kızı Fatıma’ya teslim edilmesi gerektiği Mahrûse-i Galata[‘da] Emekyemez mahallesinde sâkine işbu râfi‘atü’l-vesîka Fâtıma bt. Hamza nâm hâtun meclis-i şer‘de anası Meryem bt. Hasan nâm hâtun mahzarında üzerine da‘vâ ve takrîr-i kelâm edip anam mezbûre Meryem mahalle-i mezbûrede vâki‘ bir tarafdan imâma meşrûta vakıf menzil ve bir tarafdan hamalbaşı menzili ve bir tarafdan Molla Süleyman veresesi menzili ve bir tarafdan tarîk-i hâs ile mahdûd fevkānî bir bâb oda ve bir matbah ve tahtında kenîf ve bir mikdâr havluyu müştemil mülk menzilini yedimde olan mübâya‘a hücceti mantûkunca 1131 senesi Zilhiccesi’nin yedinci günü Galata’da kassâm-ı askerî olan Emir Ağazâde demeğle ma‘rûf es-Seyyid Mehmed Efendi huzûrunda yüz guruşa bana bey‘ u teslîm ben dahi ber-vech-i muharrer iştirâ ve tesellüm ve kabûl edip semeni olan meblağ-ı merkūm yüz guruşu kendüye tamâmen edâ ve teslîm eyleyip menzil-i mahdûd-ı mezkûr benim mülk-i müşterâm olmuş iken hâlâ anam mezbûre zabt ve tasarrufuma mümâna‘at eder suâl olunup kasr-ı yedine tenbîh olunmak matlûbumdur dedikde gıbbe’s-suâl mezbûre Meryem cevâbında fi’l-vâki‘ menzil-i mahdûd-ı mezkûru ber-minvâl-i muharrer kızı müdde‘iyye-i mezbûre Fâtıma’ya ber-mûceb-i hüccet-i şer‘iyye târih-i merkūmda yüz guruş semen-i makbûza bey‘ ve teslîm eylediğini bi-tav‘ihâ ikrâr ve i‘tirâf etmeğin alâ mûceb-i i‘tirâfihâ menzil-i mahdûd-ı mezkûru ba‘de kasri’l-yed kızı müdde‘iyye-i mezbûre Fâtıma Hâtun’a teslîme merkūme Meryem Hâtun’a tenbîh birle mâ-vaka‘a bi’l-ibtigā ketb olundu. Fi’l-yevmi’l-hâmis aşer min-Zilka‘deti’ş-şerîfe sene 1137. Şuhûdü’l-hâl: es-Seyyid Mustafa Çelebi b. es-Seyyid Mehmed, Yorgani İbrahim Çelebi b. Süleyman, İbrahim Çelebi b. Muharrem, Halil Çelebi b. Mustafa, Mustafa b. Ahmed.