Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 257 Hüküm no: 265 Orijinal metin no: [38a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ranya bt. Yani’nin eşyalarını Robye bt. İstarati v. Yani’ye sattığı El-emru hasbemâ yahvîhi nemakahü’l-fakīr ileyhi sübhânehû el-Hâc Mustafa el-Kādî bi-medîne-i Galata -gufira leh-. Mahrûse-i Galata muzâfâtından Beşiktaş nâhiyesine tâbi‘ Ortaköy nâm karyede sâkine şahsı Ahmed Çelebi b. Abdülkerîm ile Lefter v. Simoli nâm zimmî ta‘rîfleriyle mu‘arrefe olan Ranya bt. Yani nâm nasrâniye meclis-i şer‘de anasının kız karındaşı kızı olup hâlâ Galata’da Sultan Bayezid mahallesinde sâkine Robye bt. İstarati v. Yani nâm Nasrâniyenin anası ve tarafından bey‘-i âti’z-zikri tasdîka vekîli olan işbu hâmilü’r-rakīm Raliçe bt. Yanaki nâm Nasrâniye muvâcehesinde ikrâr ve takrîr-i kelâm edip yedimde olan eşyâ-yı memlûkemden bir köhne beledi döşek ve dört köhne beledi yasdık ve iki köhne minder ve üç köhne yemenî yorgan ve bir köhne mâ’î çuka ferâce ve bir sagīr tencere ve iki sahanımı bi-safkatin vâhidetin tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkile-i merkūme Robye’ye on guruşa bey‘ u temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr on guruşa müte‘allika âmme-i da‘vâdan müvekkile-i merkūme Robye’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm eşyâ-yı muharrere-i mezkûre müvekkile-i merkūme Robye’nin mülk-i müşterâsıdır benim kat‘an alâka ve medhalim kalmamışdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin aşer min-Zilka‘deti’ş-şerîfe sene 1137. Şuhûdü’l-hâl: İbrahim b. Muharrem, Halil Çelebi b. Mustafa, Yusuf Beşe b. Abdullah, İbrahim Çelebi b. Mustafa, Mustafa b. Ahmed, Mehmed b. Ahmed.