Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 258 Hüküm no: 266 Orijinal metin no: [38a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Hamza’nın annesi Meryem bt. Hasan’la müşterek menzillerindeki yarı hissesinin yarısını kocası Ahmed Beşe b. Ali’ye sattığı Mahrûse-i Galata’da Emekyemez mahallesinde sâkine ve zâtı ta‘rîf-i şer‘î ile mu‘arrefe olan Fâtıma bt. Hamza nâm hâtun meclis-i şer‘de işbu râfi‘u’l-kitâb zevci Ahmed Beşe b. Ali nâm kimesne mahzarında bi-tav‘ihâ ikrâr ve takrîr-i kelâm edip mahalle-i mezbûrede vâki‘ bir tarafdan imâma meşrûta vakıf menzil ve bir tarafdan Hamalbaşıoğlu menzili ve bir tarafdan Hallac Süleyman veresesi mülkü ve taraf-ı râbi‘den tarîk-i âm ile mahdûd fevkānî bir bâb oda ve bir matah ve tahtında kenîf ve bir mikdâr havluyu müştemil mülk menzilin nısfı benim ve nısf-ı âharı anam işbu Meryem bt. Hasan’ın ale’l-iştirâki’s-seviy mülkümüz olmağla hâlâ ben menzil-i mahdûd-ı mezkûrda mülk ve hakkım olan nısf hisse-i şâyi‘amın nısfını tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcim mezbûr Ahmed Beşe’ye yirmi beş guruşa bey‘ u teslîm eylediğimde ol dahi ber-vech-i muharrer ba‘de’l-iştirâ ve’t-tesellüm ve’l-kabûl semeni olan meblağ-ı mezbûr yirmi beş guruşa müte‘allika da‘vâdan zevcim mezbûr Ahmed Beşe’nin zimmetini ibrâ-i âmm-ı kātı‘u’n-nizâ‘la ibrâ ve ıskāt binâen aleyh menzil-i mahdûd-ı merkūm dört sehm i‘tibârıyla iki sehmi anam mezbûre Meryem Hâtun’un ve bir sehm benim ve bir sehmi zevcem mezbûr Ahmed Beşe’nin ber-vech-i iştirâk mülkümüzdür dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin aşer min-Zilka‘deti’ş-şerîfe sene 1137. Şuhûdü’l-hâl: Arusi Mustafa Efendi, Serbölük İbrahim Çelebi, Serbölük Halil Çelebi, Sırmakeş Mustafa, İbrahim b. Mustafa, Baba Yusuf b. Abdullah.