Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 261 Hüküm no: 269 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazgancı Veli Beşe b. Kamil’in varisi Rahime bt. Kamil’den hak dava eden Halil Çelebi b. Mustafa ile sulh oldukları Mahmiye-i İstanbul hısnı ebvâbından Odunkapısı dâhilinde dökmeci tâifesinden Ahmed Beşe b. Abdülkādir nâm kimesne meclis-i şer‘de kazgancı tâifesinden olup mahmiye-i mezbûrede Kâtib Hüsrev mahallesinde sâkin iken bundan akdem vefât eden Kazgancı Veli Beşe b. Kâmil b. Abdurrahman’ın li-ebeveyn kız karındaşı ve hasren veresesi olduğu cihetle mecmû‘ terekesine bi’l-verâse vâzı‘atü’l-yed olan Rahime bt. Kamil b. Abdurrahman nâm hâtun tarafından ibrâ-yı câi’z-zikri tasdîke vekîli olduğu zât-ı mezbûreyi ma‘rifet-i şer‘iyye ile ârifân es-Seyyid Mehmed b. Mustafa ve Mehmed Çelebi b. Mustafa nâm kimesneler şehâdetleriyle şer‘an sâbit olan işbu râfi‘u’l-kitâb Halil Çelebi b. Mustafa mahzarında ikrâr ve takrîr-i kelâm edip ben müteveffâ-yı mezbûr Veli Beşe’nin li-ebeveyn ammisi oğlu olup terekesinin nısfı bana isâbet eder deyü müvekkile-i mezbûre Rahime Hâtun’dan ba‘de’d-da‘vâ ve’l-inkâr müdde‘âsını bir vechile isbâta kādir olmadığından nâşî müvekkile-i mezbûre Rahime’yi adem-i ilme tahlif sadedinde olmuşidim el-hâletü hâzihî beynimize muslihûn tavassut edip beni müvekkile-i merkūme Rahime Hâtun ile an-inkâr fedâen li’l-yemîn doksan guruşa sulh eylediklerinde ben dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûr doksan guruşu vekîl-i mezbûr Halil Çelebi yedinden tamâmen ahz u kabz eylediğimden sonra ben tereke-i müteveffâ-yı mezbûra müte‘allika âmme-i da‘vâdan müvekkile-i mezbûre Rahime Hâtun’un zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi bedel-i sulh-i mezbûr doksan guruşa müte‘allika âmme-i da‘vâdan kezâlik benim zimmetimi ibrâ ve ıskāt eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ aşer min-Zilka‘deti’ş-şerîfe sene 1137. Şuhûdü’l-hâl: Ahmed Efendi b. Süleyman, Süleyman Efendi b. Osman, Mustafa Efendi b. Mehmed, İbrahim b. Mustafa, Süleyman b. Halil, Mehmed b. Ahmed, Mustafa b. Ahmed.