Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 262 Hüküm no: 270 Orijinal metin no: [39a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yamandi v. Apostol’un Apostol v. Yorgi’e yönelik tecavüz davasından men edildiği Mahrûse-i Galata’da Sultan Bayezid mahallesinde sâkin Yamandi v. Apostol nâm Ermeni mahfil-i şer‘de işbu hâmilü’r-rakīm Apostol v. Yorgi nâm zimmî muvâcehesinde üzerine da‘vâ ve takrîr-i kelâm edip merkūm Apostol târih-i kitâbdan sekiz sene mukaddem üç yaşında sagīre kızım Katerina’nın bikrini izâle edip ve eğer senin kızın merkūmeyi nikâh ile almazsam sana yüz guruş vereyim deyü va‘d etmeğin suâl olunup mûceb-i şer‘îsi icrâ olunmak matlûbumdur dedikde gıbbe’s-suâl ve akībe’l-inkâr müdde‘î-i merkūmdan ber-vech-i muharrer merkūm Apostol kızı sagīre-i merkūmenin bikrini izâle eylediğine muvâfıka beyyine taleb olundukda bir vechile ityân-ı beyyineye kādir olmayıp ve bu husûsda merkūm Apostol’a şer‘an yemîn dahi lâzım gelmeyip ve meblağ-ı mezbûr yüz guruş va‘d mekūlesinden dahi olmayıp ve da‘vâ olunması meşrû‘ olmayıp mûcebiyle müdde‘î-i merkūm Yamandi merkūm Apostol’a bî-vech mu‘ârazadan men‘ birle mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis aşer min-Zilka‘deti’ş-şerîfe sene 1137. Şuhûdü’l-hâl: Halil Çelebi b. Mustafa, Mustafa b. Ahmed, İbrahim b. Mustafa, Ahmed b. Mustafa, Mehmed b. Ahmed, Mehmed b. Osman, Mehmed b. Halil.