Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 263 Hüküm no: 271 Orijinal metin no: [39a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tahta Kadı mahallesi avarızına zıt harab vakıf menzili el-Hâc Ahmed b. Mehmed’in kiralamak istediği Husûs-ı âti’l-beyânın mahallinde ketb ve keşf ve tahmîni bâbında fermân-ı âlî sâdır olmağın imtisâlen leh savb-ı şer‘-i enverden mevlânâ Halil Efendi b. Hüseyin me’zûnen irsâl olunup ol dahi hâssa mi‘mârlardan Üstâd İbrahim Halife b. Mustafa ve Mehmed Halife b. Ahmed ile mahrûse-i Galata a‘malinden kasaba-i Kasımpaşa’da Tahta Kadı mahallesi avârızına mevkūf zikirleri câî harâb vakıf menzile varıp zeyl-i vesîkada isimleri muharrer olan Müslimîn huzûrlarında akd-i meclis-i şer‘-i şerîf-i nebevî eyledikde mahalle-i merkūme avârızı mütevellîsi el-Hâc Mehmed b. Receb meclis-i ma‘kūd-ı mezbûrda işbu râfi‘u’l-vesîka el-Hâc Ahmed b. Mehmed mahzarında bi’t-tevliye takrîr-i kelâm ve ta‘bîr ani’l-merâm edip mütevellî olduğum mahalle-i merkūme avârızı vakfından ayda otuz akçe icâre-i mü’eccele ve mu‘accele ile mezbûr el-Hâc Ahmed’in taht-ı tasarrufunda olup yine mahalle-i merkūmede vâki‘ bir tarafdan mezbûr el-Hâc Ahmed mülkü ve bir tarafdan benim menzilim ve bir tarafdan Kuyumcuzâde el-Hâc Ömer bahçesi ve bir tarafdan tarîk-i âm ile mahdûd tûlen 47 ve arzan 14 zirâ‘ bi-hesâb-ı terbî‘ 658 zirâ‘ arsayı ve fevkānî ve tahtânî büyût-ı adîdeyi ve fevkānîde vâki‘ biri tûlen altı ve arzan bir zirâ‘ sekiz parmak ve iki aded koltuk şehnişînlerini ve üç aded dekâkîn ve bi’r-i mâyı müştemil vakıf menzil mürûr-ı ezmân ile müşrif-i harâb ve mâil-i türâb olup bir vechile kabîl-i süknâ olmayıp ve taraf-ı vakıfda dahi binâya müsâ‘ade olmadığından mâ‘adâ masrûfunu mu‘accelesine mahsûben binâya gerek müste’cir-i mezbûr el-Hâc Ahmed tarafından ve gerek taraf-ı âhardan rağbet olunmayıp ve hâli üzere terk ve ibkā olunduğu takdîrce hükm-i nakzda olan ebniye-i mevcûdesi bi’l-külliye zâyi‘ ve telef olmağla vakfa gadr olacağı zâhir olup lâkin menzil-i mezbûrun enkāzı keşf ve tahmîn ve arsa-i merkūme üzerine mâlıyla nefsiʼçün murâd eylediği vech üzere ebniye ihdâsına taraf-ı vakıfdan izin verildikde müste’cir-i merkūm el-Hâc Ahmed menzil-i mezbûrun ayda otuz akçe icâre-i mü’eccelesine on beş akçe dahi zam ve arsa-i mevkūfe-i merkūmeyi beher şehr kırk beşer akçe icâre-i mü’eccele ile istîcâra tâlib ve râgıb olup ve minvâl-i muharrer üzere kefş ve îcâr cânib-i vakfa hayr ve enfa‘ [39b] olmağın menzil-i mezbûrun enkāz-ı mevcûdesi keşf ve mesâha ve tahmîn-i sahîh ile takvîm ve tahmîn olunması bi’t-tevliye murâdımdır dedikde mevlânâ-yı mezkûr dahi mi‘mârân-ı mezbûrân ve zeyl-i sütûrda isimleri muharrer olan ebniye şinâs müslimûn-ı hâzırûn ile menzil-i mezbûra nazar eylediklerinde hâl bi’l-cümle mütevellî-i mezbûrun takrîr-i meşrûhu üzere olduğunu mu‘âyene ve müşâhede eylediklerinden sonra mi‘mârân-ı mezbûrân İbrahim Halife ve Mehmed Halife menzil-i mezbûrun enkāz-ı mevcûdesini mesâha eylediklerinden sonra zikr olunan iki aded şehnişînler ile ma‘an tûlen ve arzen bi-hesâb iki yüz elli bir zirâ‘ altı parmak enkāzının her zirâ‘ı otuz akçeden cem‘an kıymet-i şer‘iyyesi yedi bin beş yüz otuz üç akçedir ziyâdeye tahammülü yokdur deyü mi‘mârân-ı mezbûrân ile Müslimûn-ı hâzırûn alâ vechi’l-vifâk icmâ‘ ve ittifâk eylediklerinden sonra vâki‘ hâli mevlânâ-yı mezkûr mahallinde ketb u tahrîr ve ba‘dehû ma‘an ba‘s olunan Süleyman Beşe b. Abdullah ve Muhzır Bursalı Mehmed b. Ahmed ile mahfel-i şer‘a gelip alâ-vukū‘ihî inhâ ve takrîr etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis aşer min-Zilka‘deti’ş-şerîfe sene 1137. Şuhûdü’l-hâl: Umdetü’l-kuzât Ali Efendi kâtib-i vakf-ı mezbûr, Abdullah Efendi b. Ali Efendi, el-Hâc Ali b. Abdullah, el-Hâc İsmail b. Abdullah, el-Hâc Mustafa b. el-Hâc Mehmed, Mehmed Halife b. Ahmed müezzin, el-Hâc Mehmed b. Hasan, Osman Beşe b. Ömer, Mehmed Çelebi b. Ali, Mehmed Çelebi b. Hasan, Ali Çelebi b. el-Hâc Ramazan, el-Hâc Abdullah b. Mehmed, Mehmed Çelebi el-ma‘rûf bi-Kara Hoca, İsmail Çelebi b. Ahmed, Sarı Mehmed Çelebi b. Hasan.