Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 264 Hüküm no: 272 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullâh bt. Mustafa’nın es-Seyyid Ali b. Receb’den muhalaa ile boşandığı Mahrûse-i Galata muzâfâtından kasaba-i Tophane’de Cihangir mahallesinde sâkine olup zâtını ma‘rifet-i şer‘iyye ile ârifân olan Ali b. Mustafa ve İbrahim b. Mehmed nâm kimesneler ta‘rîfleriyle mu‘arrefe olan Emetullâh bt. Mustafa nâm hâtun meclis-i şer‘de zevc-i muhâlı‘ı işbu râfi‘u’l-vesîka es-Seyyid Ali b. Receb nâm kimesne mahzarında bi-tav‘ihâ ikrâr ve takrîr-i kelâm edip zevcim mezbûr es-Seyyid Ali ile beynimizde adem-i hüsn-i mu‘âşeretden nâşî hul‘a tâlibe ve râgıbe olduğum ecilden zimmetinde mütekarrır ve ma‘kūdün-aleyh olan üç bin akçe mehr-i mü’eccelimden geçip nafaka-i iddet ve me’ûnet-i süknâm dahi kendi üzerime olmak üzere zevcim mezbûr es-Seyyid Ali ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyyete müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sânî aşer min-Zilka‘deti’ş-şerîfe sene 1137. Şuhûdü’l-hâl: Hüseyin b. Mustafa, Halil Çelebi b. Mustafa, es-Seyyid Ali Ağa b. Hasan, Süleyman b. Ahmed, İbrahim b. Muharrem.