Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 265 Hüküm no: 273 Orijinal metin no: [39b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamide bt. el-Hâc Mustafa’nın Hüseyin Beşe b. Murad’dan muhalaa ile boşandığı Mahrûse-i Galata’da Emekyemez mahallesinde sâkine ve zâtı ta‘rîf-i şer‘î ile mu‘arrefe olan Hamide bt. el-Hâc Mustafa nâm hâtun meclis-i şer‘de zevc-i muhâlı‘ı işbu râfi‘u’l-kitâb Hüseyin Beşe b. Murad nâm kimesne mahzarında bi-tav‘ihâ ikrâr ve takrîr-i kelâm edip zevcim mezbûr Hüseyin ile beynimizde adem-i hüsn-i mu‘âşeretden nâşî hul‘a tâlibe ve râgıbe olduğum ecilden zimmetinde mütekarrır ve ma‘kūdün-aleyh olan iki bin yüz akçe mehr-i mü’eccelimden geçip nafaka-i iddet ve me’ûnet-i süknâm dahi kendi üzerime olmak üzere târih-i kitâbdan üç gün mukaddem mezbûr Hüseyin ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru kabûl eylemiş idi hâlâ biz hukūk-ı zevciyyete müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mâ-vaka‘a bi’l-ibtigā ketb olundu. Fi’l-yevmi’l-ışrîn min-Zilka‘deti’ş-şerîfe sene 1137. Şuhûdü’l-hâl: İmâm Abdurrahim Efendi, Müezzin es-Seyyid Mustafa Halife, Manav el-Hâc Abdurrahman, Sırmakeş Mustafa, Mehmed b. Ahmed.