Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 265 Hüküm no: 274 Orijinal metin no: [39b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mısır tüccarlarından Süleyman’ın kolyon hocası Seyyid Ahmed aracılığıyla ortağı el-Hâc Abdullah’a gönderdiği para davasında sulh olduğu Mısır tüccârından el-Hâc Süleyman b. el-Hâc Süleyman nâm kimesne meclis-i şer‘de tüccâr kalyonlarından İsmail Kapudan’ın râkib olduğu kalyonun hocası olan işbu râfi‘u’l-kitâb es-Seyyid Ahmed b. es-Seyyid Mustafa mahzarında ikrâr ve takrîr-i kelâm edip târih-i kitâbdan sekiz ay mukaddem Mısr-ı Kahire’ye tâbi‘ medîne-i Reşid’de sâkin şerîkim el-Hâc Abdullah’a îsâl ve teslîm için mezbûr es-Seyyid Ahmed Hoca’ya mâlımdan alâ-tarîki’l-emâne üç yüz elli guruş def‘ u teslîm ol dahi ber-vech-i muharrer yedimden ba‘de’l-ahz şerîkim gāib-i mezbûr el-Hâc Abdullah’a îsâl ve teslîm etmemeğle meblağ-ı mezbûru mezbûr es-Seyyid Ahmed Hoca’dan taleb eylediğimde ol dahi meblağ-ı merkūmu yedimden ahzını ikrâr lâkin meblağ-ı merkūm kapudan kamarasında mahfûz iken bilâ ta‘addin velâ taksîr zâyi‘ oldu deyü iddi‘â edip ve mezbûr es-Seyyid Ahmed Hoca husûs-ı mezbûrda emîn olmağla şer‘an kendüye aybından gayri bir nesne lâzım gelmemeğin mezbûru tahlîf sadedinde olmuş idim el-hâletü hâzihî beynimize muslihûn tavassut edip beni mezbûr es-Seyyid Ahmed Hoca ile da‘vâ-yı mezkûremden fedâen li’l-yemîn yüz elli guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru kabûl ve bedel-i sulh-i mezbûrun yetmiş beş guruşunu yedinden ahz u kabz ve bâkī kalan yetmiş beş guruşu dahi Reşid’de sâkin şerîkim olan gāib-i mezbûr el-Hâc Abdullah’a def‘ u teslîme mezbûr es-Seyyid Ahmed Hoca’ya emr eylediğimde oldahi meblağ-ı bâkī-i merkūmu emrime binâen şerîkim gāib-i mezbûra teslîme ta‘ahhüd eyledikden sonra ben mâ‘adâsı olan iki yüz guruşa müte‘allika da‘vâdan mezbûr es-Seyyid Ahmed Hoca’nın zimmetini ibrâ ve ıskāt eyleyip ol dahi bedel-i mezbûr yüz elli guruşa müte‘allika da‘vâdan kezâlik benim zimmetimi ibrâ ve ıskāt eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-ışrîn min-Zilka‘deti’ş-şerîfe sene 1137. Şuhûdü’l-hâl: Ali Çelebi b. Osman, Hasan Ağa b. Ali, Mehmed Çelebi b. Abdurrahman, Mehmed Beşe b. Ali, Molla İbrahim el-mukayyid, Ali Çavuş el-mübâşir, İbrahim b. Muharrem.