Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 266 Hüküm no: 275 Orijinal metin no: [39b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Abdullah’ın Osman Beşe b. Abdullah’dan muhalaa ile boşandığı Mahrûse-i Galata muzâfâtından kasaba-i Kasımpaşa’da el-Hâc Hüsrev mahallesinde sâkine ve zâtı es-Seyyid Mustafa b. Musa ve Eyüb b. Ebûbekir nâm kimesneler ta‘rîfleriyle mu‘arrefe olan Fâtıma bt. Abdullah nâm hâtun meclis-i şer‘de zevc-i muhâlı‘ı işbu râfi‘u’l-kitâb Osman Beşe b. Abdullah nâm kimesne mahzarında ikrâr ve takrîr-i kelâm edip zevcim mezbûr Osman Beşe ile beynimizde adem-i hüsn-i mu‘âşeretden nâşî hul‘a tâlibe ve râgıbe olduğum cihetle zimmetinde mütekarrır ve ma‘kûdün-aleyh olan iki bin beş yüz akçe mehr-i mü’eccelimden fâriğa olup nafaka-i iddet ve me’ûnet-i süknâm dahi kendi üzerime olmak üzere zevcim mezbûr Osman Beşe ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyyete müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ aşer min-Zilka‘deti’ş-şerîfe sene 1137. Şuhûdü’l-hâl: İbrahim Çelebi b. Abdullah, Halil Çelebi b. Mustafa, Yusuf b. Abdullah, Mustafa b. Ahmed, Ali b. Ahmed, Mehmed b. Ahmed.