Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 266 Hüküm no: 276 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukadar el-Hâc Mehmed b. Mehmed’in uhdesinde olan Vakıfhan arsasının sekiz hissesini Ahmed Efendi b. Abdurrahman’a ferağ ve tefviz eylediği Mahrûse-i Galata’da vâki‘ Karamustafa Paşa mahallesinde sâkin Çukadâr el-Hâc Mehmed b. Mehmed nâm kimesne meclis-i şer‘-i şerîf-i nebevîde hâlâ câlis-i sadr-ı fetvâ olan müfti’l-enâm şeyh-i meşâyihi’l-İslâm sellemehü’l-meliki’s-selâm hazretlerinin kethudâlıkları hizmetiyle şeref-yâb olan umdetü’l-müderrisîni’l-kirâm Ahmed Efendi b. Abdurrahman tarafından ferâğ-ı câi’z-zikri tasdîka sâbitü’l-vekâle vekîli olan işbu râfi‘u’l-vesîka Hekimzâde Avram v. Harun nâm Yahûdi muvâcehesinde ikrâr ve takrîr-i kelâm edip merhûm Sofu Mehmed Paşa ile Ayasofya-i Kebîr ve Sofyanos vakıflarından olup mahrûse-i Galata’da Karaköy kapısı dâhilinde vâki‘ bir tarafdan Tal‘atî Mustafa Efendi odaları ve bir tarafdan Vakıfhân ve iki tarafdan cidâr-ı hısn ile mahdûd Vakıfhân arsasının merhûm Sofu Mehmed Paşa Vakfı’ndan altı hissede iki hissesini ve Ayasofya-i Kebîr Vakfı’ndan altı hissede üç hissesi ve Sofyanos Vakfı’ndan kezâlik altı hissede üç hissesi ki cem‘an sekiz hissesi cidâr-ı hısn ile ma‘an icâre-i mu‘accele ve mü’eccele ile benim taht-ı tasarrufumda olmağın hâlâ ben zikr olunan sekiz sehm hisse-i şâyi‘amın hakk-ı tasarrufunu sekiz yüz guruş bedel mukābelesinde mütevellîleri izniyle müvekkil-i müşârun-ileyh Ahmed Efendi’ye ferâğ ve tefvîz eylediğimde ol dahi ber-minvâl-i muharrer tefevvüz ve tesellüm ve kabûl eyledikden sonra bedel-i ferâğ-ı merkūm sekiz yüz guruşu müvekkil-i müşârun-ileyh yedinden tamâmen alıp kabz eyledim fîmâ ba‘d sâlifü’z-zikr Vakıfhân yedinde olan sekiz sehm hisse-i şâyi‘am müvekkil-i müşârun-ileyh Ahmed Efendi’nin hakk-ı müfevvezidir benim kat‘an alâka ve medhalim kalmamışdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fî-15 Zilka‘de sene 1137. Şuhûdü’l-hâl: Halil Efendi başkâtib-i mahkeme, Arusi Mustafa Efendi kâtib-i mahkeme, Ahmed Efendi kâtib-i mahkeme, Ali Efendi b. Ömer Efendi, Süleyman Efendi b. Osman, İbrahim Çelebi b. Muharrem, Halil Çelebi b. Mustafa, Bursalı Mehmed b. Ahmed.