Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 267 Hüküm no: 277 Orijinal metin no: [40a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Ağa b. el-Hâc Mustafa’nın mülk menzilini Ali Reis b. Abdullah’a sattığı Mahrûse-i Galata a‘mâlinden kasaba-i Kasımpaşa’da Kulaksız Ahmed mahallesinde sâkin Abdullah Ağa b. el-Hâc Mustafa nâm kimesne meclis-i şer‘de işbu râfi‘u’l-kitâb Ali Reis b. Abdullah nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup mahalle-i mezbûrede vâki‘ bir tarafdan Maranko Abdullah Çelebi menzili ve bir tarafdan Sa‘lebci Ahmed Çelebi menzili ve bir tarafdan Emir Efendi Vakfı ve ba‘zen tarîk-i hâs ile ve bir tarafdan tarîk-i âm ile mahdûd fevkānî bir bâb oda ve bir sofa ve tahtânî bir bâb oda ve dehlîz ve def‘a tahtânî iki bâb oda ve iki kenîf ve bir bi’r-i mâ ve eşcâr-ı müsmire ve gayr-ı müsmireli bahçeyi müştemil mülk menzilimi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Ali Reis’e dört yüz otuz guruşa bey‘ u temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr dört yüz otuz guruşu mezbûr Ali Reis yedinden tamâmen ahz u kabz eyledim ba‘de’l-yevm menzil-i mahdûd-ı mezkûr bi-cemî‘i mâ yeştemilühû ve yahvîhi mezbûr Ali Reis’in mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fî 25 min Zilka‘de sene 1137. Şuhûdü’l-hâl: Mustafa Ağa b. Yahya, Mehmed Beşe b. Ali, Süleyman Reis b. Abdullah, Maranko Abdullah Beşe, Süleyman b. Abdullah, İbrahim b. Muharrem.