Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 268 Hüküm no: 278 Orijinal metin no: [40a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manol v. Monovasod’un mülk menziliyle bir dut ağacını Likofer v. Basver’e sattığı Mahrûse-i Galata a‘mâlinden Marmara nâhiyesine tâbi‘ Kalemli nâm karyede sâkin Manol v. Monovasod nâm zimmî meclis-i şer‘de işbu hâmilü’r-rakīm Likofer v. Basver nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup karye-i mezbûrede vâki‘ bir tarafdan Kiryako menzili ve bir tarafdan Sinoy menzili ve bir tarafdan Yorgaki menzili ve bir tarafdan tarîk-i âm ile mahdûd fevkānî iki bâb oda ve dehlîz ve tahtında matbah ve kenîf ve şırahâne ve bir mikdâr havluyu müştemil mülk menzilim ile hudûd-ı mezkûr hâricinde vâki‘ bir dip kara dut ağacımı bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Likofer’e kırk altı guruşa bey‘ u temlîk edip ol dahi ber-vech-i muharrer iştirâ ve temellük ve kabûl eyledikden sonra semeni olan kırk altı guruşu merkūm Likofer yedinden tamâmen ahz u kabz ve menzil-i mahdûd-ı mezkûr ile zikr olunan bir dib kara dut ağacını mahallinde zabt ve tasarrufa merkūm Likofer’i taslît eyledim ba‘de’l-yevm menzil-i mahdûd-ı mezkûr ile bir dib kara dut ağacı bi-cemî‘i mâ yeştemilühû ve yahvîhi merkūm Likofer’in mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevm 25 sene 1137. Şuhûdü’l-hâl: Mehmed Beşe b. Hüseyin, Konyalı Ali Beşe b. Hüseyin, Molla Mahmud Beşe b. İbrahim, İbrahim Çelebi b. Mustafa, Foti v. Yanaki, Yanaki v. Togodoş, Antoy v. Todori.