Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 268 Hüküm no: 279 Orijinal metin no: [40a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe b. Mustafa’nın Hocaoğlu Süleyman Beşe’deki eşyalarının Ali Beşe’nin varislerinin vekili ve babası Mustafa Beşe b. İvaz tarafından alındığı Fi’l-asl vilâyet-i Anadolu’da Atina kazâsına tâbi‘ Araneş nâm karye ahâlîsinden olup mahmiye-i İstanbul’da Mercan Hânı’nda misâfiren sâkin iken bundan akdem vefât eden Ali Beşe b. Mustafa b. ivaz b. Nebi nâm kimesnenin verâseti zevce-i metrûkesi Hadice bt. Abdullah nâm hâtuna ve sulbî oğulları Osman ve Mustafa ve Hüseyin’e ve sulbiye kızları Âişe ve diğer Hadice’ye ve babası diğer Mustafa’ya münhasıra ve tashîh-i meseleleri bi-hükmi’l-ferâiz yüz doksan iki sehimden mu‘teber olup sihâm-ı mezbûreden 24 sehmi mezbûre Hadice’ye ve otuz dörder sehimi mezbûrûn Osman ve Mustafa ve Hüseyin’den her birine ve on yedişer sehm mezbûretân Âişe ve diğer Hadice’den her birine ve otuz iki sehimi mezbûr diğer Mustafa’ya isâbeti tahakkukundan sonra mezbûr Osman meclis-i şer‘de işbu râfi‘u’l-kitâb Hocaoğlu Süleyman Beşe b. Hüseyin [40b] nâm kimesne mahzarında üzerine da‘vâ ve takrîr-i kelâm edip benim hâl-i sıgārımda babam müteveffâ-yı mezbûr bu tarafda vefât etmeğle yanında mevcûd bulunan terekesini veresesine îsâle mezbûr Süleyman Beşe vasiyy-i muhtâr olmağla mezbûr Süleyman Beşe babam müteveffâ-yı mezbûrun terekesinden iki yüz altmış guruşluk eşyâsını zabt edip veresesine îsâl etmemeğle suâl olunup meblağ-ı mezbûrdan tashîh-i mezbûr üzere otuz dört sehm hisseme isâbet eden beş bin beş yüz yirmi dört akçeyi bana teslîme tenbîh olunması matlûbumdur dedikde gıbbe’s-suâl mezbûr Süleyman Beşe cevâbında müteveffâ-yı mezbûrun îsâle vasîsi olmağla terekesinden ancak yüz altmış guruşluk eşyâsını zabt eylediğini ikrâr ziyâdeyi inkâr eylediğinden mâ‘adâ mezbûr Ali Beşe’nin vefâtından sonra babası mezbûr Mustafa bu tarafa gelip verese-i mezbûreden kibârın vekilleri ve sıgārın tesviye-i umûrlarını rü’yete kıbel-i şer‘den mansûb vasîleri olduğu cihetle mezbûr Ali Beşe’nin terekesinden yedimde olan yüz altmış guruşluk eşyâsını asâleten ve vekâleten ve vesayeten bi’t-tamâm ahz u kabz etmeğle müteveffâ-yı mezbûrun yedimde ve zimmetimde bir akçe bâkī kalmayıp hattâ mezbûr Mustafa Beşe oğlu müteveffâ-yı mezbûrun terekesini vech-i muharrer üzere yedimden kabzını şuhûd-ı udûl mahzarında kirâren ikrâr ve işhâd dahi etmişdir deyü def‘le mukābele edicek gıbbe’l-istintâk ve’l-inkâr evvelen mezbûr Süleyman Beşe’den def‘-i mezkûrunu mübeyyine beyyine taleb olundukda udûl-i ahrâr-ı ricâl-i Müslimînden ve kazâ-i mezbûre ahâlîsinden olup mahrûse-i Galata’da ber-vech-i müsâferet sâkinler olan el-Hâc Mustafa b. Ahmed ve el-Hâc Ali b. Fethullah ve Mehmed Reis b. el-Hâc Mustafa ve Süleyman Beşe b. Abdullah nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ müteveffâ-yı mezbûr Ali Beşe’nin babası mezbûr Mustafa Beşe b. İvaz b. Nebi müteveffâ-yı mezbûrun veresesinden kibârın vekîlleri ve sığārın tesviye-i umûrlarına kıbel-i şer‘den mansûb vasîleri olmağla mezbûr Mustafa Beşe’yi bundan akdem mahmiye-i İstanbul’a varıp oğlum mezbûr Ali Beşe’nin hîn-i vefâtında mâlında mevcûd bulunan terekesinden yüz altmış guruşluk eşyâsını îsâle vasîsi olan Hocaoğlu işbu Süleyman Beşe yedinden asâleten ve vekâleten ve vesayeten bi’t-tamâm ahz u kabz etmişdirim meblağ-ı mezbûrdan mezbûr Süleyman Beşe yedinde ve zimmetinde bir akçe bâkī kalmamışdır deyü huzûrumuzda kirâren ikrâr ve bizi işhâd eyleyip biz bu husûsa bu vecih üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdekleri makbûle olmağın ve sâniyen mezbûr Osman’dan mezbûr Süleyman Beşe’nin müteveffâ-yı mezbûrun terekesinden ziyâde yüz guruşluk eşyâsını kabza beyyine taleb olundukda ityân-ı beyyineden izhâr-ı acz ile isre’l-istihlâf ve ba‘de’t-tahlîfi’ş-şer‘î mûcebiyle mezbûr Osman merkūm Süleyman Beşe’ye bî-vech mu‘ârazadan men‘ birle mâ-vaka‘a bi’l-ibtigā ketb olundu. Fi’l-yevmi’s-sâdis min-Zilka‘deti’ş-şerîfe sene 1137. Şuhûdü’l-hâl: İbrahim Çelebi b. Muharrem, el-Hâc Bekir, Mustafa Beşe b. Receb, İbrahim b. Mustafa, Bursalı Muhzır Hasan, Yusuf b. Abdullah.