Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 270 Hüküm no: 280 Orijinal metin no: [40b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gabril v. Filibos’un menzilini Agapa v. Agop’a sattığı Mahrûse-i Galata hâricinde Kamer Hâtun mahallesinde sâkin Gabril v. Filibos nâm Ermeni mahfil-i şer‘de işbu hâmilü’r-rakīm Agpa v. Agop nâm Ermeni muvâcehesinde ikrâr ve takrîr-i kelâm edip akd-i âtî sudûruna değin yedimde mülküm olup mahalle-i merkūmede vâki‘ bir tarafdan benim odalarım ve bir tarafdan Saltana mülkü ve tarafeynden sahrâ ve tarîk-i âm ile mahdûd tûlen dokuz arzen yedi zirâ‘ ve altı parmak bi-hesâb-ı terbî‘i altmış beş zirâ‘ ve altı parmak arsa üzerinde mebnî fevkānî ve tahtânî birer bâb oda ve dehlîz ve benim odalarım tarafından tûlen ve arzen üçer zirâ‘ kenîf arsasını ve yine zikr olunan oda tarafından tahta-pûş binâsıʼçün arzen iki zirâ‘ havalı ve müşterek sokak kapısını müştemil mülk menzilimi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Agapa’ya iki yüz elli guruşa bey‘ u teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûru müşterî-i merkūm yedinden tamâmen alıp kabz eyledim fîmâ ba‘d menzil-i mahdûd-ı mezkûr bi-cümletin mâ yeştemilühû ve yahvîhi müşterî-i merkūm Agapa’nın mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve bi’l-ibtigā ketb olundu. Fi’l-yevmi’s-sâlis ve’l-ışrîn min-Zilka‘deti’ş-şerîfe sene 1137. Şuhûdü’l-hâl: Ahmed Efendi b. Süleyman, Süleyman Efendi b. Osman, Mustafa Efendi b. Mehmed, İbrahim Çelebi b. Muharrem, Halil Çelebi b. Mustafa, Mustafa b. Ahmed, Mehmed b. Ahmed, Mail v. Avram, Bogasıci Baron.