Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 270 Hüküm no: 281 Orijinal metin no: [40b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Süleyman b. Abdurrahman’ın alacaklı olduğu ortağı Abdullah Beşe b. Osman ile sulh oldukları El-emru hasbemâ yahvîhi nemakahu’l-fakīr ileyhi sübhânehû el-Hâc Mustafa el-Kādî bi-medîne-i Galata. Mahrûse-i Galata muzâfâtından kasaba-i Tophane’de el-Hâc Memi mahallesinde sâkin el-Hâc Süleyman b. Abdurrahman nâm kimesne meclis-i şer‘de umûr-ı tüccârdan şerîki olan işbu râfi‘u’l-kitâb Abdullah Beşe b. Osman nâm kimesne mahzarında ikrâr ve takrîr-i kelâm edip mezbûr Abdullah Beşe’ye fâide beynimizde münâsafaten iktisâm etmek üzere mâlımdan üç yüz guruş teslîm ve kendü ile ma‘an Boğazhisarı’na varıp çanak ve pekmez ve üzüm turşusu iştirâ edip mahmiye-i İstanbul’a geldiğimizde mezbûr Abdullah Beşe eşyâ-yı muharrere-i mezkûreyi âhara ba‘de’l-bey‘ mâl-ı mezbûrdan mezbûr Abdullah Beşe’yi bi‘d-defe‘ât iki yüz otuz beş guruşunu bana teslîm eyleyip asl-ı mâl-ı mezbûrdan altmış beş guruş ve fâide-i hâsılasından dahi on yedi buçuk guruş ki cem‘an seksen iki buçuk guruş bâkī kalmış idi deyü taleb ve da‘vâ sadedinde olmuş idim el-hâletü hâzihî beynimize muslihûn tavassut edip beni da‘vâ-yı mezkûremden mezbûr Abdullah Beşe ile yetmiş guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûr yetmiş guruşu mezbûr Abdullah Beşe yedinden tamâmen ahz u kabz eylediğimden sonra husûs-ı mezbûra ve beynimizde cereyân eden sâir ahz u i‘tâ ve mu‘âmelât-ı şettâya müte‘allika âmme-i da‘vâdan her birimiz âharın zimmetini ibrâ ve ıskāt edip ve ticâret-i mezkûreden zimem-i nâsda olan ma‘lûmü’l-aded akçe mezbûr Abdullah Beşe’nin kendi mâlı olup benim kat‘an alâka ve medhalim kalmamışdır dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâdî aşer min-Zilka‘deti’ş-şerîfe sene 1137. Şuhûdü’l-hâl: Mehmed Ağa b. Mustafa, Ali Bey b. Abdurrahman, Çukadâr el-Hâc Mehmed b. Mehmed, Mehmed Odabaşı b. Abdullah.