Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 797 Hüküm no: 1044 Orijinal metin no: [124a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ekmekçi Pavlo, Yanko ve Yorgi’nin, Mano v. Yanko’dan ekmek işindeki ortaklıktan dolayı alacaklı oldukları Ekmekçi tâifesinden Pavlo v. Papas ve Yanko v. Hristo ve Yorgi v. Yanko nâm zimmîler meclis-i şer‘-i hatîrde Mano v. Yanko nâm zimmî muvâcehesinde her biri üzerine da‘vâ ve takrîr-i kelâm edip bundan akdem medîne-i Üsküdar’da Kolluk kurbunda vâki‘ ekmekçi fırınında merkūm Mano ile şirket üzre ekmekçi olup fesh-i akd-i şirket edip beynimizde hesâb gördüğümüzde mezbûrun zimmetinde asl-ı mâldan sekiz bin iki yüz akçe zuhûr etmişidi hâlâ meblağ-ı mezbûru merkūmdan taleb ederiz suâl olunsun dediklerinde, gıbbe’s-suâl mezbûr Mano kaziyye minvâl-i meşrûh üzre olup asl-ı mâlı şirket-i mezbûrdan zimmetimde vâcibü’l-kazâ sekiz bin iki yüz akçe deynim vardır deyû ikrâr ve i‘tirâf etmeğin mûcebince meblağ-ı mezbûru müdde‘iyyûn-ı merkūmûna edâ ve teslîme mezkûr Mano’ya tenbîh olunup mâ vaka‘a bi’t-taleb ketb olundu. Fi’l-yevmi’r-râbi‘ aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Mehmed b. Ramazan, Abdi Çelebi b. Hüseyin, Baba Resul [b.] Rıdvan, Mehmed b. Mustafa.