Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 798 Hüküm no: 1045 Orijinal metin no: [124a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülkādir Efendi b. Himmet’in terekesinin vârisler arasında paylaşılması Mahmiye-i İstanbul’da Emir Buhârî mahallesinde sâkin iken bundan akdem vefât eden Abdülkādir Efendi b. Himmet’in verâseti sulbî kebîr oğulları Ahmed Çelebi ve Mehmed Çelebi ve Şaban Çelebi ve sulbiye kebîre kızı Huban’a ve zevce-i metrûkeleri Fâtıma bt. Mustafa ve vilâyet-i Anadolu’da Akyazı kasabasında sâkine diğer Fâtıma bt. Ahmed nâm hâtunlara münhasıra olduğu şer‘an zâhir ve mütehakkik oldukdan sonra mezbûre Fâtıma bt. Ahmed’in hâlâ zevci ve tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân hatîb Mustafa Efendi b. İvaz ve Ahmed b. Mehmed nâm kimesneler şehâdetleriyle şer‘an sâbit olan Mustafa b. Piyâle meclis-i şer‘-i şerîfde müteveffâ-yı mezbûrun terekesine vâzı‘ü’l-yed olan râfi‘ü’l-kitâb mezbûr Ahmed Çelebi mahzarında ikrâr ve takrîr-i kelâm edip müvekkilem mezbûre diğer Fâtıma’nın müteveffâ-yı mezbûr Abdülkādir Efendi zimmetinde mütekarrir ve ma‘kūdun-aleyh olan üç bin akçe mehr-i müecceli mezbûr Ahmed Çelebi yedinde olan tereke-i müteveffâ-yı mezbûrdan tamâmen ahz u kabz ettiğimden sonra müteveffâ-yı mezbûrun bâkī terekesinden müvekkilem mezbûre diğer Fâtıma’nın on altı sehimden bir sehim hisse mukābelesinde mezbûr Ahmed Çelebi ile şerâiti hâvî ve mevâni‘den ârî bi tarîki’t-tehârüci’ş-şer‘î on iki bin akçe üzerine sulh olup bedel-i sulh-i mezbûru merkūm Ahmed Çelebi yedinden tamâmen ahz u kabz eylediğimden sonra tereke-i müteveffâ-yı mezbûra müte‘allika de‘âvâdan mezbûr Ahmed Çelebi’nin ve sâir veresenin zimmetlerini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Hüseyin Efendi el-İmâm, Ahmed Ağa b. Mustafa, İsmail Çelebi b. ( ) Kethüdâ-yı Emir Efendi, Mehmed Beşe b. Abdullah, Hüseyin b. Mustafa, Mehmed b. Mustafa, Mehmed Çelebi b. Ramazan.