Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 271 Hüküm no: 282 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boyacı esnafı kethüdalığına İbrahim b. Mustafa’nın tayin edildiği Mahrûse-i Galata ve tevâbi‘inde vâki‘ boyacı tâifesinin kethudâları iken bundan akdem vefât eden Pehlivan İbrahim Beşe’nin fevtinden tâife-i merkūme üzerine kıbel-i şer‘den bâ-hüccet-i şer‘iyye kethudâ nasb ve ta‘yîn olunan Yovan v. Ustumani nâm zimmî pîr ve alîl olup kethudâlık umûrunu rü’yetde âciz olduğundan nâşî kendi hüsn-i rızâsıyla kethudâlıkdan kasr-ı yed etmeğin yine tâife-i merkūme ustalarından olup her vechile mu‘temed ve müstakīm ve hizmet-i mezbûra uhdesinden gelmeğe kādir olduğundan mâ‘adâ tâife-i merkūmenin marzî ve muhtârları olan işbu râfi‘u’l-vesîka İbrahim b. Mustafa nâm kimesne kıbel-i şerî‘at-ı garrâdan tâife-i merkūme üzerlerine kethudâ nasb ve ta‘yîn olundukda ol dahi ber-vech-i muharrer zikr olunan kethudâlığı kabûl ve hizmet-i lâzimesini mahallinde ikāmete ta‘ahhüd etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’r-râbi‘ ve’l-ışrîn min-Zilka‘deti’ş-şerîfe sene 1137. Şuhûdü’l-hâl: İbrahim Çelebi b. Muharrem, Halil Çelebi b. Mustafa, İbrahim b. Mustafa, Mustafa b. Ahmed, Mehmed b. Ahmed, Petro v. Rani, Kosta v. Marko, Angeli v. Todori, Yanaki v. Yani, Vasil v. Petro, Dimitri v. Yovan.