Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 272 Hüküm no: 283 Orijinal metin no: [41a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kumaşcı esnafının kethüdalığına Yani v. Manol’un tayini Mahrûse-i Galata ve tevâbi‘inde vâki‘ dîmî tâifesinden Geromi v. Mike ve Yani v. Manol ve Mike ve Geromi ve Visenci v. Bati ve Corci v. Cani ve Frankoli ve Todori ve Andon v. Pipi nâm zimmîler vesâirleri meclis-i şer‘de hâlâ beynlerinde kethudâ nasb ve ta‘yîn eyledikleri işbu râfi‘u’r-rakīm Yani v. Manol nâm zimmî muvâcehesinde her biri ikrâr ve takrîr-i kelâm edip kadîmü’l-eyyâmdan bu güne gelince umûrumuzu rü’yet için beynimizde bir kethudâ nasb ve ta‘yîn olunagelip ve hâlâ kethudâmız olan işbu hâzır bi’l-meclis Nikola v. Manol nâm zimmînin evzâ‘ ve etvârından cümlemiz hoşnûd ve râzîler olmadığımız cihetle merkūm Nikola’yı ihrâc ve yerine merkūm Yani’yi beynimizde bi’l-ittifâk kethudâ nasb ve ta‘yîn ve ihtiyâr eyledik dediklerinde merkūm Yani dahi ber-vech-i muharrer kethudâlığı kabûl ve mahallinde hıdemât-ı lâzimesini ikāmete ta‘ahhüd etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin ve’l-ışrîn min-Zilka‘deti’ş-şerîfe sene 1137. Şuhûdü’l-hâl: İbrahim Çelebi b. Muharrem, Halil Çelebi b. Mustafa, İbrahim b. Mustafa, Süleyman b. Ahmed, Mustafa Beşe b. Receb, Mehmed b. Ahmed Bursavi.