Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 272 Hüküm no: 284 Orijinal metin no: [41a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anton v. Mihal ile Vinita bt. Yorgi’nin müşterek menzillerini Corci v. Kostantin’e sattıkları Mahrûse-i Galata’da Sultan Bayezid mahallesi mütemekkinlerinden Anton v. Mihal nâm zimmî ile şahsı ta‘rîf-i şer‘î ile mu‘arrefe olan Vinita bt. Yorgi nâm Nasrâniye meclis-i şer‘-i şerîf-i nebevîde işbu hâmilü’r-rakīm Corci v. Kostantin nâm zimmî muvâcehesinde her biri ikrâr ve takrîr-i kelâm edip akd-i âti’z-zikrin sudûruna değin ale’l-iştirâki’s-seviy silk-i mülkümde münselik olup mahrûse-i mezbûre hâricinde Tatavla nâm karyede vâki‘ bir tarafdan Rozi nâm Nasrâniye mülkü ve bir tarafdan Dimitri mülkü ve bir tarafdan âhar Dimitri mülkü ve bir tarafdan tarîk-i âm ile mahdûd tahtânî üç bâb oda ve bi’r-i mâ ve kenîf ve eşcâr-ı müsmire ve gayr-i müsmireli mülk bahçeyi müştemil mülk menzilimizi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile mersûm Corci’ye beş yüz guruş ile bir kabza mechûlü’l-aded fülûsa bey‘ u temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm beş yüz guruş ile mechûlü’l-aded bir kabza fülûsu mezbûr yedinden bi-kadri’l-hısas ahz u kabz edip mechûlü’l-aded bir kabza fülûsu işbu meclis-i şer‘de izâ‘at ve itlâf eyledik fîmâ ba‘d menzil-i mahdûd-ı mezkûr bi-cümletin mâ yeştemilühû ve yahvîhi mersûm Corci’nin mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ ve’l-ışrîn min-Zilka‘deti’ş-şerîfe sene 1137. Şuhûdü’l-hâl: Hüsameddin Efendi imâm, el-Hâc Ömer Efendi müezzin, Molla Ahmed b. İsmail Efendi, Bahçıvan Süleyman Çelebi, es-Seyyid Abdurrahman Çelebi, Halil Çelebi b. Mustafa, Baba Yusuf b. Abdullah, Dimitri v. Danil, Drako v. Dimitri, Laskari v. Dimitri, Dimo v. Panayot, Praşkova v. Tafri, Papa Yorgi ve Manol, Rali v. Apostol, Yamandi v. Pandari, Papa Mafinpor v. Foli.