Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 273 Hüküm no: 285 Orijinal metin no: [41a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Paskal v. Can’ın Karaköy İskelesi’nden Girid ceziresine gidip gelecek gemisinin icarı hususunda Hüseyin Ağa, el-Hâc Yusuf b. Mehmed ve el-Hâc Mehmed b. Mustafa ile anlaştıkları Fransız kapudanlarından Paskal v. Can nâm müste’men meclis-i şer‘de tüccâr tâifesinden işbu ashâbi’l-kitâb Hüseyin Ağa b. Ahmed ve el-Hâc Yusuf b. Mehmed ve el-Hâc Mehmed b. Mustafa nâm kimesneler mahzarlarında ikrâr ve takrîr-i kelâm edip Tercümân Franko v. Can Batiste hâzır olduğu hâlde hâlâ mahrûsa-i Galata hısnı ebvâbından Karaköykapısı hâricinde vâki‘ iskelede merbût örf-i mellâhînde Şeytiye ta‘bîr olunur sefînemin âlât ve su ve kumanya ve kumanya vaz‘ olunan mahallerden mâ‘adasını İstanbul’dan Deryâ-yı Sefîd’de vâki‘ Girid cezîresinde kâin Hanya veyâhud Kandiye limanına varınca beş yüz yirmi beş guruşa mezbûrûn Hüseyin Ağa ve el-Hâc Yusuf ve el-Hâc Mehmed’e îcâr ve teslîm eylediğimde onlar dahi ber-vech-i muharrer iştirâken istîcâr ve kabûl eylediler dedikde gıbbe’t-tasdîki’ş-şer‘î yine kapudân-ı merkūm Paskal meclis-i mezbûrda eşhâs-ı mezbûre mahzarlarında i‘âde-i kelâm edip işbu târih-i kitâb-ı şehrînin yirmi[nci] günü tamâmına değin İstanbul’dan hareket olunup esnâ-i tarîkde Cezîre-i Sakız’a uğrana ve eğer sefîne-i mezbûrenin navlu beş yüz yirmi beş guruşdan ziyâde olursa ziyâdenin nısfı benim ve nısf-ı âharı eşhâs-ı merkūmenin ola ve cümle gümrük harcı mezbûrûnun olup konsolos ve liman harcları benim ola ve bu tarafda her ne mikdâr navl alınırsa ücret-i mezbûreye mahsûben ben kabz eyleyim inşâallâhu te‘âlâ selâmet ile zikr olunan Girid cezîresine vardıkda ücret-i mezbûre beş yüz yirmi beş guruş bana tamâmen edâ olunmadıkça sefîneden bir nesne ihrâc olunmamak üzere eşhâs-ı mezbûre ile beynimizde kavl ve ittifâk ve ahd ü mîsâk eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fî-gurre-i Zilhicce sene 1137. Şuhûdü’l-hâl: İbrahim Çelebi b. Muharrem, Mustafa Çelebi b. Mustafa, Mustafa b. Ahmed, Mehmed b. Ahmed, Ali b. Ahmed.